Presidentja e Komisionit Evropian, Ursula von der Leyen, ka reaguar me tone të forta pas vendimit të Presidentit amerikan Donald Trump për vendosjen e një tarife 30% mbi produktet e eksportuara nga Bashkimi Evropian drejt SHBA-së, duke paralajmëruar pasoja serioze për ekonominë globale dhe furnizimet transatlantike.
Në një deklaratë zyrtare, von der Leyen theksoi se tarifat e reja, të planifikuara për të hyrë në fuqi më 1 gusht, “do të prishin zinxhirët kryesorë të furnizimit transatlantik dhe do të dëmtojnë bizneset dhe konsumatorët në të dy anët e Atlantikut”.
Ajo tha se BE-ja mbetet e hapur për dialog dhe një zgjidhje të negociuar deri në afatin e përcaktuar, por paralajmëroi se është e përgatitur të marrë të gjitha masat e nevojshme për të mbrojtur interesat e saj, përfshirë kundërmasa proporcionale.
“Pak ekonomi në botë janë aq të hapura dhe të drejta në praktikat tregtare sa Bashkimi Evropian”, shtoi von der Leyen, duke theksuar se përballë një krize të mundshme tregtare, BE-ja do të thellojë partneritetet e saj globale bazuar në rregullat ndërkombëtare dhe respektin e ndërsjellë.
Ky qëndrim vjen menjëherë pas shpalljes nga Trump të tarifave të reja, të cilat kanë ngjallur shqetësim në tregjet ndërkombëtare dhe frikë për një përplasje ekonomike midis dy prej fuqive më të mëdha tregtare në botë.
Trump vendos 30% tarifë kundër mallrave të BE-së dhe Meksikës
