Një skenë që të kujton filmat aksion është regjistruar mbrëmjen e të premtes në qytetin e Sarandës.
Burime për mediat bëjnë me dije se një person është hedhur në det për t’i shpëtuar arrestimit nga Policia. Ngjarja ka ndodhur në rrugën “Butrinti”, pranë shëtitores së qytetit.
Uniformat blu kanë ndaluar një automjet luksoz, tip “Porsche Panamera”, në të cilin ndodheshin tre persona.
Në momentin kur efektivët tentuan ndalimin, njëri prej tyre zbriti me shpejtësi nga automjeti dhe u largua me vrap, duke u hedhur më pas në det. Ai mbante një çantë në krah. Dy personat e tjerë u ndaluan dhe u shoqëruan nga forcat “Shqiponja”.
Vendin e ngjarjes e rrethuan më pas dhjetëra forca policie, ndërsa në det ndërhyri policia kufitare me një skaf. Pas një ndjekjeje të shkurtër në ujë, i dyshuari u kap dhe u nxor në shëtitore, ku u shoqërua drejt komisariatit.
Dyshohet se ai ka hedhur në det sende të paligjshme, ndërsa hetimet janë në vijim për të zbardhur rrethanat e kësaj ngjarjeje të pazakontë.
