Presidenti francez Emmanuel Macron dhe kryeministri britanik Keir Starmer kanë rënë dakord për një marrëveshje të re për menaxhimin e emigracionit të paligjshëm, duke nisur një program pilot që parashikon “shkëmbimin” e emigrantëve mes dy vendeve.
Sipas marrëveshjes, emigrantët që kapen duke kaluar ilegalisht Kanalin Anglez do të ndalohen dhe do të kthehen në Francë. Në këmbim, një numër i kufizuar emigrantësh që kanë lidhje familjare në Mbretërinë e Bashkuar do të lejohen të hyjnë ligjërisht dhe në mënyrë të kontrolluar.
Ky program pilot do të nisë në javët e ardhshme dhe është pjesë e një strategjie më të gjerë për të luftuar rrjetet e trafikut të njerëzve dhe për të krijuar rrugë të sigurta dhe ligjore për azilkërkuesit që kanë të drejtë.
Starmer e përshkroi marrëveshjen si “revolucionare”, ndërsa Macron e quajti një “përgjigje reale” pas nëntë vitesh stagnim dhe faji të ndërsjellë mes dy vendeve. Të dy liderët theksuan rëndësinë e bashkëpunimit për të ndaluar kalimet e rrezikshme dhe për të mbrojtur të drejtat e migrantëve.
Franca ka angazhuar tashmë 1,200 agjentë sigurie shtesë për të forcuar kontrollet në kufijtë e saj veriorë, ndërkohë që pritet që kjo marrëveshje të krijojë një model të ri menaxhimi për krizën e emigracionit në Evropë.
