Me urdhër të Edi Ramës, në mbarë vendin ka nisur një aksion i gjerë për lirimin e hapësirave publike të zaptuara padrejtësisht nga biznese apo individë të ndryshëm.
Por, duket se kjo nismë ka dështuar që në fillim, pasi aksioni po bëhet selektiv, pa prekur bizneset e “miqve” të Qeverisë, të cilët kanë zaptuar hapësiar publike edhe më shumë se të tjerët.
Deputeti i zgjedhur i “Lëvizjes Bashkë”, Redi Muçi denoncoi në Euronews Albania se restoranti i Xhemal Qefalisë në zonën e “Pazarit të Ri” në Tiranë nuk ishte cënuar fare, ku nuk ishte hequr asnjë karrige, edhe pse bllokon rrugën.
“Kjo bëhet sa për sy e faqe. Më qëlloi sot që kalove tek Pazari i Ri. Aty kishin hequr, kishin pastruar ca tezga, ata fshatarët që shesin aty. Restoranti i Xhemal Qefalisë, brenda rrethimit të të cilit ndodhet edhe një lapidar që përkujton një ngjarje të luftës, nuk ishte prekur fare. Nuk ishte prekur asnjë karrige, ai bllokon rrugën aty, por nuk ishte cënuar absolutisht fare. Gjithë kjo furtunë në gotë që po ngrihet, ngrihet vetëm për të tërhequr vëmendjen nga problematika reale që ka vendi, duke nisur nga turizmi, bujqësia, industria, dhe për të ngritur një retorikë boshe.” – tha Redi Muçi.
