Kreu i lëvizjes “Shqipëria Bëhet”, Adriatik Lapaj, ka reaguar ashpër ndaj fenomenit të ndërtimeve pa leje në vend, duke akuzuar qeverinë Rama se ka nxitur paligjshmërinë për përfitime elektorale.
Sipas Lapajt, mesazhi që qeveria ka përçuar është i qartë: “Ndërtoni tani, na jepni votën dhe do ua legalizojmë.”
Kjo strategji, sipas Lapajt, jo vetëm që dëmton rendin ligjor, por i trajton qytetarët si mjete për qëllime politike.
“Ndërtimet pa leje nuk duhet të tolerohen në asnjë rrethanë. Askush nuk duhet të lejohet të ndërtojë jashtë kuadrit ligjor. Është fakt që në Shqipëri të marrësh leje është thuajse mision i pamundur. Kanë dashur ta shtyjnë qytetarin gjithë kohës në paligjshmëri që pastaj ta rrjepin nga xhepat e ta mbajnë peng për votën.
Qeveria aktuale, duke shtyrë në mënyrë të përsëritur afatin e legalizimeve para çdo palë zgjedhjesh, ka dhënë një mesazh të qartë: “Ndërtoni tani, na jepni votën dhe ne do t’ua legalizojmë.” Kështu ka ndodhur. Pra, ka qenë vetë qeveria ajo që i ka nxitur qytetarët të ndërtojnë në mënyrë të paligjshme”– shprehet Lapaj në një reagim në rrjete sociale.
Në reagimin e tij, kreu i ‘Shqipëria Bëhet’ ngre alarmin për rastin e 40 objekteve pa leje në një fshat të vetëm, duke vënë në dyshim funksionimin e institucioneve përgjegjëse.
“Si ka mundësi që në vitin 2025, kur Republika ka investuar miliona dollarë në satelitë e dronë për kontrollin e territorit, lejohet ndërtimi pa leje në masë? Kush i ka lejuar? Ku janë zyrtarët e arrestuar për këtë?”– shprehet Lapaj.
Reagimi i plotë:
Ne jemi kategorikisht kundër ndërtimeve pa leje, por…
Ndërtimet pa leje nuk duhet të tolerohen në asnjë rrethanë. Askush nuk duhet të lejohet të ndërtojë jashtë kuadrit ligjor.
Është fakt që në Shqipëri të marrësh leje është thuajse mision i pamundur. Kanë dashur ta shtyjnë qytetarin gjithë kohës në paligjshmëri që pastaj ta rrjepin nga xhepat e ta mbajnë peng për votën.
Qeveria aktuale, duke shtyrë në mënyrë të përsëritur afatin e legalizimeve para çdo palë zgjedhjesh, ka dhënë një mesazh të qartë: “Ndërtoni tani, na jepni votën dhe ne do t’ua legalizojmë.” Kështu ka ndodhur. Pra, ka qenë vetë qeveria ajo që i ka nxitur qytetarët të ndërtojnë në mënyrë të paligjshme.
Si ka mundësi që në vitin 2025, kur Republika Legjendare ka shpenzuar miliona dollarë për satelitë dhe dronë që supozohet të kontrollojnë çdo centimetër të territorit, deri edhe mizat…lejohet ndërtimi i 40 objekteve pa leje në një fshat të vetëm? Kush i ka lejuar? Si ka ndodhur kjo pa dijeninë apo bashkëpunimin e institucioneve shtetërore? Apo i lanë sa u morën paratë dhe votën?
Kush janë zyrtarët e arrestuar për këto ndërtime?
A po trajtohen të gjithë njësoj përballë ligjit, apo vazhdojmë me standardin e dyfishtë: disa të nënës, disa të njerkës? A po prishen të gjitha objektet pa leje të ndërtuara kudo në Republikë?
Ne besojmë fort në shtetin ligjor dhe nuk mbështesim asnjë ndërtim të paligjshëm, por të tallesh me djersën e njerëzve është ligësi.
Ndaj o motra e vëllezër u folëm për ligjin. Ndaj u thamë mos zgjidhni politikën e pazareve se do u kushtojë shtrenjtë. Uroj të reflektoni! Përpara janë zgjedhjet e pjesshme dhe ato lokale. Mos vazhdoni më me politikën e hajnave.
