Një situatë alarmante po zhvillohet në verilindje të vendit, ku murtaja e kafshëve të imta është shfaqur dhe po përhapet me shpejtësi në disa fshatra të Kukësit.
Burime për JOQ ALBANIA bëjnë të ditur se çdo ditë në fshatrat Arrën, Shtiqen, Bardhoc dhe Bushtricë po ngordhin bagëti, kryesisht dele dhe dhi.
Banorët thonë se përmasat që po merr sëmundja janë të mëdha, ndërkohë që autoritetet vendore kanë dhënë urdhër që situata të kalojë në heshtje.
Sipas deklaratave të qytetarëve, Kryetari i Bashkisë, Albert Halilaj, ka ushtruar presion ndaj punonjësve dhe banorëve, duke i kërcënuar me largim nga puna nëse flasin publikisht për shpërthimin e sëmundjes.
“Po ngordhin kafshët çdo ditë dhe askush nuk po ndërhyn. Na bëjnë presion të mos flasim, por kjo situatë po na rëndon”, shprehet një banor i zonës.
Në një përrua të një prej fshatrave të prekur, banorët kanë identifikuar një vend ku janë hedhur trupat e mbi 100 kafshëve të ngordhura, të cilat dyshohet se janë prekur nga sëmundja. Situata paraqet rrezik të madh edhe për përhapjen e infeksionit në mjedis dhe te njerëzit.
Deri më tani, nuk ka pasur reagim zyrtar nga institucionet veterinare apo Ministria e Bujqësisë, ndërsa banorët bëjnë thirrje për ndërhyrje urgjente për të ndaluar përhapjen e murtajës dhe për të mbrojtur jetesën e tyre.
Mesazhi i qytetarit:
“Kemi urdher nga Kryetari i Bashkis Albert Halilaj qe mos te flasim dhe ne Kukes eshte shfaq Murtaja, po ngodhin bageti cdo dite ne Arren, Shtiqen, Bardhoc , Bushtric, na ben presjon me largim nga puna po te flasim Kryetari i Bashkis
Ne prrua me poshte eshte kasaphane jane 100 cop bageti te ngordhura./ JOQ
