Policia e Kosovës ka reaguar në lidhje me kërcënimin me bombë një ditë më parë në Kuvendin e Kosovës. Sipas policisë, bazuar nga hetimet e deritanishme, kërcënimet kanë ardhur përmes një numri telefoni, i cili dyshohet se është nga Serbia.
Blutë bëjnë me dije se do të vazhdojnë hetimet për të lokalizuar mjetet dhe rrjetet e komunikimiit që janë përdorur në këtë kërcënim.
“Bazuar në hetimet e deritanishme, dyshohet se kërcënimet kanë ardhur përmes një numri të telefonit i cili dyshohet se është nga Serbia. Policia në bashkëpunim me prokurorinë kompetente do të vazhdojë hetimet e mëtejme, duke marrur të gjitha masat hetimore, përfshirë edhe komunikimet me partnerë ndërkombëtar të sigurisë, për të lokalizuar mjetet, rrjetet e komunikimit që janë përdoruar në këtë kërcënim“, njofton policia për mediat.
Kujtojmë se pas kërcënimeve për bombë në ndërtesën e Kuvendit të Kosovës, Policia nisi kontrollin e ndërtesës dhe makinave që gjenden në parkingun e këtij institucioni.
Ndërkohë, deputetët, punonjësit dhe gazetarët u larguan nga ndërtesa dhe oborri i Kuvendit.
Dje ishte hera e 42-të që deputetët u mblodhën, çdo të dytën ditë që nga 15 prilli, dhe dështuan ta përmbushin detyrimin kushtetues. Për dallim nga grumbullimet e kaluara, në takimin e e një dite më parë të pranishëm ishin vetëm 74 deputetë nga 120 sa ka Kuvendi i Kosovës.
Ky dështim i radhës erdhi pavarësisht takimeve të presidentes Vjosa Osmani me partitë parlamentare për të ndihmuar në gjetjen e një rrugëdaljeje dhe paralajmërimeve të saj se do të ketë pasoja juridike nëse nuk bëhet Kuvendi deri më 26 korrik.
