Ylli i popit Katy Perry dhe aktori Orlando Bloom kanë konfirmuar zyrtarisht ndarjen e tyre. Çifti ka qenë i lidhur që nga viti 2016 dhe kanë një vajzë katër-vjeçare.
Në një deklaratë të përbashkët dhënë për mediat amerikane, përfaqësuesit e tyre thanë se marrëdhënia ka ndryshuar gjatë muajve të fundit dhe tashmë janë të përqendruar tek rritja e vajzës.
“Ata do të vazhdojnë të jenë bashkë si familje, pasi prioriteti i tyre i përbashkët është dhe gjithmonë do të jetë rritja e vajzës së tyre me dashuri, stabilitet dhe respekt të ndërsjellë,” thuhej në deklaratë.
Ylli i popit, 40 vjeç, dhe aktori 48-vjeçar u ndanë në vitin 2017, por u ribashkuan pak kohë më vonë. Ata u fejuan në Ditën e Shën Valentinit në vitin 2019. Një vit më pas, Perry njoftoi se ishte shtatzënë lajm nëpërmjet këngës së saj “Never Worn White”. Vajza e tyre, Daisy Dove, lindi më vonë po atë vit.
Ndarja e çiftit vjen pas një viti të vështirë për Perry. Albumi i saj më i fundit, 143, dhe kënga kryesore “Woman’s World” nuk u pritën aq mirë. Këngëtarja është aktualisht në një turne, por sipas raporteve, shitjet e biletave kanë qenë më të dobëta krahasuar me fillimet e karrierës së saj.
Këngëtarja amerikane, e cila më parë ka qenë e martuar me Russell Brand, u bë e famshme në vitin 2008 me këngën “I Kissed A Girl”, e cila arriti vendin e parë në Mbretërinë e Bashkuar.
Orlando Bloom ka qenë më parë i martuar me modelen australiane Miranda Kerr, me të cilën ka një djalë, Flynn, 14 vjeç. Aktori britanik është i njohur për rolet në filmat Pirates of the Caribbean, The Lord of the Rings dhe The Hobbit.
