Një kaos u shkaktua pasditen e sotme në zonën e “Vasil Santos”, në ish-Bllok dhe “Myslym Shyri” në Tiranë, kur forcat “Shqiponja” të Policisë së Shtetit u vunë në ndjekje të një “Audi Q8”.
Uniformat blu iu bënë shenjë dy të rinjëve për të ndaluar, pas dyshimeve se ata ishin të armatosur, por nuk iu bindën urdhrit dhe tentuan të arratiseshin.
Gjatë ndjekjes, dy të rinjtë kanë përplasur me makinë tre automjete të tjerë, teksa më pas kanë hedhur armën e zjarrit pistoletë në rrugë dhe janë arratisur. Pasagjeri nuk ia dali dot, pasi është arrestuar nga Policia, ndërsa drejtuesi i mjetit është shpallur në kërkim. Në pranga është vënë shtetasi Skerdi Sina, 29 vjeç.
Ky i fundit rezulton i përfshirë në ngjarjen e ndodhur në “Astir” më 9 Janar, ku së bashku me 4 shokë të tjerë dyshohet se mbajtën të mbyllur në një apartament me qira ditor në Astir vajzën 21-vjeçare Sajma Q.
Veç Skerdi Sinës, në atë kohë u shpallën në kërkim edhe shtetasit: Anduen Alia, 36 vjeç dhe Ogert Alia, 31 vjeç, Joni Sadikaj, 26 vjeç, dhe Arnold Jaho, 40 vjeç. Mbi ta rënduan akuzat për veprat penale “Heqja e paligjshme e lirisë”, kryer në bashkëpunim, “Mbajtja pa leje dhe prodhimi i armëve, armëve shpërthyese dhe e municionit” dhe “Falsifikimi i dokumenteve”.
Atë ditë, Policia e Tiranës u alarmua nga telefonata e 21-vjeçares, e cila kërkoi ndihmë me pretendimin se po mbahej me forcë nga disa persona në një apartament në Astir. Kur policia mbërriti në vendngjarje, vajza refuzoi të bashkëpunonte. U desh ndërhyrja e forcave speciale Renea për të shpëtuar të renë ku më pas u zbulua se më shumë se sa një pengmarrje kishte të bënte me një festë mes të rinjsh ku nuk mungonte droga, alkoli dhe armët.
Vajzat me të cilat djemtë kaluan mbrëmjen e 8 janarit i thanë Policisë se kishin qenë në festë me dëshirën e tyre në dy shtëpitë e marra me qira nga djemtë, por hetimet zbuluan se më shumë se sa një festë e çmendur mes miqsh, personat e përfshirë rezultonin jo vetëm me precedentë penal por të gjendur fajtor edhe nga gjykata për trafikimin e sasive të mëdha lëndëve narkotike.
