Janë zbardhur detaje të reja nga aksioni i ndërmarrë ditën e sotme nga Policia e Fierit dhe Tatimet tek zyrat qëndrore të “Bankers Petroleum Albania”, e cila operon në sektorin e nxjerrjes së naftës në fushën e Marinzës.
Burime për mediat bëjnë me dije se në total janë lëshuar 14 urdhër-arreste, ku janë ekzekutuar 10 prej tyre. Në pranga mësohet se kanë përfunduar CEO kinez i Bankers, Hongping Xiao dhe ish-CEO, Leonidha Çobo.
Po të njëjtat burime konfirmojnë se ndaj të arrestuarve janë ngritur akuzat për evazion fiskal dhe pastrim parash. Dyshohet se aksioni i sotëm ka të bëjë me një borxh të konsiderueshëm që “Bankers” i ka shtetit shqiptar, konkretisht në lidhje me detyrime fiskale të papaguara.
Ende nuk ka një reagim zyrtar nga kompania apo institucionet shtetërore.
Bankers Petroleum Albania, kompania e përpunimit të hidrokarbureve është prodhuesi më i madh i naftës në vend. Njëkohësisht edhe një nga ndotësit më të mëdhenj në zonën e Patos-Marinzës.
EMRAT/ Arrestohen dy drejtuesit e “Bankers Petroleum”, shkak dyshohet borxhi ndaj shtetit
