Real Madrid mund 1-0 Juventusin dhe pret biletën për në çerekfinale të Kupës së Botës për Klube, ku do ndeshet me fituesin e çiftit Dortmund-Monterrey, sfidë që luhet pas mesnate.
Përsa i përket sfidës së sotme, në minutën e 7-të, Juventus pati shansin e artë të kalonte në avantazh, ku pas një kundërsulmi të shpejtë dhe një topi shumë të bukur të Kenan Yildiz, Kolo Muani i vetëm përballë Courtois, gabon gjithçka duke çuar topin mbi traversë.
Në minutën e 29-të, ishte radha e Jude Bellingham për të gabuar para portës dhe për të humbur një mundësi të mirë për të shënuar. Anglezi mori një top të bukur nga Federico Valverde, por goditja e tij pranë shtyllës së parë u ndal nga Di Gregorio.
Në fund të pjesës së parë, Federico Valverde iu afrua golit me një super goditje nga distanca, por Di Gregorio i tha “jo”. Mes shumë rasteve, por që mungoi konkretizimi final, pjesa e parë e supersfidës mbyllet në barazim pa gola.
Në fillim të pjesës së dytë, madrilenët gjetën golin e avantazhit në minutën e 53-të me zbulimin e Kupës së Botës për Klube, Gonzalo Garcia, i cili shënoi me kokë pas asistit të mrekullueshëm të Alexander-Arnold, i pari me fanellën e Realit.
Rezultati nuk ndryshoi deri në fund. Real Madrid fiton 1-0 dhe vazhdon rrugëtimin më tej, Juventus e mbyll këtu aventurën në Kupën e Botës për Klube.
