Në seancën e procesit gjyqësor “Plumbi i Artë”, avokati Sokol Hazizaj i kërkoi gjykatës që në momentin kur të dëshmojë Erjon Alibej, të largohet nga salla i pandehuri Nuredin Dumani. Kjo kërkesë u kundërshtua nga prokuroria dhe vetë Dumani. Gjykata vendosi që gjatë dëshmisë së Alibej, Dumani mund të qëndrojë në sallë.
Nga ana tjetër, avokatja Elda Zotaj, mbrojtëse e të pandehurit Klevis Ndoci, kërkoi përjashtimin e gjyqtares kryesuese Engjëllushe Tahiraj nga trupa e gjykimit në këtë proces. Kërkesa lidhej me refuzimin e radhës të kërkesave të palës së mbrojtjes, ndërsa Zotaj akuzoi kryesuesen se merr vendime pa u konsultuar me anëtarët e tjerë të trupës dhe merr parasysh vetëm kërkesat e organit të akuzës.
Prokurori Behar Dibra reagoi ashpër, duke e cilësuar sjelljen e avokates Zotaj si të qëllimshme dhe kontraverse. Ai kërkoi që ajo të zëvendësohet, duke theksuar se kërkesat e saj janë të pabazuara dhe po shkaktojnë ndërprerje të përsëritura të seancave.
“Duhet të merret një vendim për të zëvendësuar avokaten, qoftë kryesisht. Kjo është bërë shkak për ndërprerjen e seancës për herë të disatë,” deklaroi Dibra.
Prokurorja Doloreza Musabelli e cilësoi kërkesën e Zotajt si të pabazuar ligjërisht dhe kërkoi që të caktohet masa maksimale ndaj avokates, si dhe që Dhoma e Avokatëve të njoftohet për rastin. Ajo kërkoi gjithashtu ndërprerjen e seancave për shkak të mungesës së mbrojtjes ligjore për të pandehurin Altin Ndoci.
Në përfundim, Gjykata e Posaçme vendosi zëvendësimin e avokates Elda Zotaj me avokaten Pranvera Doci. GJKKO njoftoi se ky vendim mund të ankimohet brenda afatit ligjor.
