Në Gjykatën e Posaçme kundër Korrupsionit dhe Krimit të Organizuar (GJKKO), seanca e sotme për dosjen “Plumbi i Artë” u shoqërua me debate të forta, kryesisht në lidhje me marrjen në dorëzim të 6 akteve hetimore që përfshijnë dëshmitë e Erjon Alibejt para prokurorëve.
Në këtë proces, tre persona janë bashkëpunëtorë të drejtësisë: Nuredin Dumani, Erjon Alibej dhe Skerdi Tase.
Prokurorja Doloreza Musabelliu theksoi gjatë fjalës së saj se statusi i bashkëpunëtorit nuk mund të vihet në diskutim nga mbrojtja.
“Këto janë provat që kemi sjellë në gjykatë. Marrëveshja me bashkëpunëtorin është në dosje. Statusi nuk mund të vihet në diskutim. Më 29 qershor 2023 është lidhur marrëveshja me Alibejnë. Vetëm organi i akuzës ka të drejtë t’ia heqë këtë status”, deklaroi Musabelliu.
Nga ana tjetër, avokati Aldo Shkëmbi kundërshtoi, duke argumentuar se kërkesa e mbrojtjes për të pasur akses në materialet hetimore kishte bazë ligjore.
Ndërkohë, prokurori Behar Dibra i cilësoi kërkesat e mbrojtjes si të përsëritura dhe jashtë objektit të seancës.
“Kur morëm në pyetje Erjon Alibej, kjo kërkesë nuk u parashtrua. Pyetjet duhet të bëhen mbi ato që ka thënë në seancë,” u shpreh Dibra.
Debati në sallën e gjykatës mes avokates së Altin Ndocit dhe prokurorit Behar Dibra
Pas debatit, Gjykata vendosi të urdhërojë Prokurorinë që të vendosë në dispozicion deklarimet e Erjon Alibejt të dhëna gjatë vitit 2022.
Gjithashtu, avokati Sokol Hazizaj kërkoi që gjatë dëshmisë së Alibejt të largohet nga salla bashkëpunëtori tjetër, Nuredin Dumani. Kjo kërkesë u kundërshtua nga Prokuroria dhe vetë Dumani. Në përfundim, Gjykata vendosi që Dumani të qëndrojë i pranishëm në sallë gjatë dëshmisë së Alibejt.
