Nga Elton Qyno
Një seri deklarimesh të mara përmes një telekamere audio dhe video të pandehurit Erjon Alibej, janë bërë shkak i përsëritjes së debatit me tone të larta mes avokatëve mbrojtës dhe prokurorëve të çështjes, që përfaqësojnë akuzën në gjykimin ndaj të pandehurve të dosjes “Plumbi i Artë”.
Kërkesat e avokatëve mbrojtës vijnë në një kohë kur Erjon Alibej, i cili ka përfituar statusin e bashkëpunëtorit të SPAK, ka përfunduar dëshminë e tij dhënë para gjykatës dhe tashmë radha për pyetjen e tij, e kanë avokatët mbrojtës.
Mbrojtësit ligjorë i kanë kërkuar prokurorisë dhe gjyqtares Ëngjëllushe Tahiri, që ti venë në dispozicion dhe 6 proces-verbale me deklarime që Erjon Alibej, ka dhënë në muajin qershor dhe dhjetor të vitit 2022.
Bëhet fjalë për dëshmi të dhëna nga Alibej, në kohën pasi ishte marrë i pandehur dhe dosja kundër tij ishte dërguar në gjykatë së bashku me Xhuljano Hoxhën dhe Euglen Halilin, duke u akuzuar drejtpërdrejt si urdhëruesi, financuesi dhe organizatori i vrasjes së Emiljano Ramazanit dhe Regis Runaj.
Në total Erjon Alibej është marë në pyetje 10 herë. Dy deklarimet e para i ka dhënë për llogari të prokurorisë së Elbasanit, e cila kishte rregjistruar dosjen kundër tij.
Në këtë deklarime Alibej tregon se nuk kishte njohje dhe shoqëri me Xhuljano Hoxhën dhe Euglen Halilin, më të cilët ishte arrestuar për vrasjen e Ramazanit dhe Runaj.
Një fakt të tillë ja përmendi dhe në seancë gjyqësore i pandehuri Xhuljano Hoxha, i cili i vuri në dukje Alibej se bashkë ishin ritur dhe njiheshin qysh fëmijë në Elbasan. Madje sipas tij kishin ngrënë fara luledielli në shkallët e pallatit.
Në dy seanca me radhë avokatët pretendojnë se janë njohur nga SPAK vetëm me dy proces-verbale deklarimi të Alibej, i cili është marrë në pyetje në datën 12 dhe 13 korrik 2023.
Ndërsa për 6 proces-verbalet e tjerë të marrjes në pyetje të Alibej më konkretisht në datat 14 qershor 2022, 15, 16, 17, 20 qershor 2022 si dhe 15 dhjetor 2022, avokatët nuk janë njohur me atë çfarë ka pohuar Alibej.
Prokurorët pretenduan sot se s’mund të vihen në dispozicion këto proces-verbale, pasi lidhen me procedime të tjera penale, që s’kanë objekt këtë dosje gjyqësore.
Ndërsa në dosjen hetimore të dërguar për shqyrtim gjyqësor në gjykatë, SPAK thotë se:
“…në cilësinë e bashkëpunëtorit të drejtësisë i është marrë deklarim shtetasit Erion Alibej (pyetur dhe në datat 14,15,16,17,20.06.2022, si person nën hetim, deklarime të marrë me mjete audio- video, dokumentuar me proces-verbalin përkatës ndaj të cilit, transkriptuar më datë 29 shtator 2022, dokumentuar me proces-verbalin përkatëse, si dhe pyetur më datë 15.12.2022, si person nën hetim, dokumentuar me proces-verbalin ndaj të cilit zhvillohen hetime…).
Të gjitha këto proces-verbale janë bërë shkak i debatit në sallën e gjyqit mes avokatëve dhe prokurorëve, ku njëra palë i kërkon gjykatës të dorëzojë dokumentet, ndërsa prokuroria kërkon që të mos i dorëzojë.
Avokatët u larguan në shenjë proteste, ndërsa gjyqtarja Ëngjëllushe Tahiri, paralajmëroi disa prej tyre për gjobitjen me 300 mijë lekë të vjetra./ Ora News
