Gjykata e Apelit në Romë ka pezulluar vendimin për vlefshmërinë e ndalimeve ndaj 43 emigrantëve të sjellë në Shqipëri javën e kaluar, duke e referuar çështjen për shqyrtim në Gjykatën e Drejtësisë së Bashkimit Evropian.
Emigrantët, të cilët vijnë nga Bangladeshi dhe Egjipti, ishin transferuar në qendrën e paraburgimit për riatdhesim në Gjadër të Lezhës. Me skadimin e afateve për ndalimet dhe në mungesë të një vendimi përfundimtar, ata do të rikthehen në Itali.
Sipas gjykatës, ky vendim është në përputhje me precedentët e krijuar që nga 18 tetori, kur gjyqtarët e seksionit të specializuar për çështjet e emigracionit në Romë nuk kishin vlerësuar si të vlefshme ndalimet e lëshuara nga policia për emigrantët e parë të transferuar në Shqipëri.
