Një ngjarje e rëndë është regjistruar në zonën e Salernos, Itali, ku një biznesmen italian ka qëlluar për vdekje një të ri shqiptar dhe ka plagosur rëndë një tjetër, gjatë një tentative të dyshuar për grabitje.
Viktima është Rivaldo Rusi, 25 vjeç, banues në Francolise, i cili humbi jetën menjëherë pas të shtënave. Të plagosurit është një tjetër shtetas shqiptar, 28 vjeç, që ndodhet në gjendje të rëndë në spitalin “Cardarelli” në Napoli. Ndërkohë, një i tretë, po ashtu shqiptar, është ende në arrati.
Autori i ngjarjes është identifikuar si Aurelio Valiante, 58 vjeç, një biznesmen i njohur ndërtimi, i cili ka pranuar përpara autoriteteve italiane se ka qëlluar me armë zjarri pasi tre persona hynë në vilën e tij në Cilento. Ai ka deklaruar se përdori një pushkë gjahu për të mbrojtur pronën e tij.
Veç vrasjes, Valiante akuzohet edhe për fshehjen e trupit të Rusit si dhe për plagosjen e rëndë të të riut tjetër.
Ngjarja ka tronditur komunitetin shqiptar në Itali. Në Sant’Andrea del Pizzone, lagjja ku jetonte viktima, shumë bashkëkombës janë mbledhur për të ngushëlluar familjen e tij. Rivaldo Rusi la pas gruan dhe një djalë.
