Kreu i Strukturës së Posaçme Anti-Korrupsion (SPAK), Altin Dumani, gjatë një eventi me temë “Përtej monitorimit: Drejt një reformë zgjedhore gjithëpërfshirëse për integritetin e zgjedhjeve në Shqipëri”, ka raportuar për krimet zgjedhore, lidhur me zgjedhjet e 11 Majit.
Gjatë fjalës së tij, Dumani tha se kanë regjistruar kallëzimet vetëm për 43 materiale kallëzuese, ku shtoi se kanë nisur hetimet dhe se kanë ushtruar kontrolle në zyra dhe banesa duke sekuestruar prova dhe dokumente të rëndësishme.
Në lidhje me kallëzimet e partive politike për krimet zgjedhore, Dumani tha se ato kanë qenë të paplota dhe shpesh herë të pasakta.
Altin Dumani: 192 raste të dyshuara për krime zgjedhore. 43 materiale kallëzuese janë regjistruar si procedime penale, kanë kaluar në fazën e hetimit, për 43 është vendosur mosfillimi i hetimit, 40 materiale janë dërguar për kompetencë pranë prokurorive të rretheve, 17 materiale janë bashkuar me materiale të tjera ekzistuese dhe një pjesë është në proces verifikimi.
Hetimet për shumë nga procedimet janë aktive, janë ushtruar disa kontrolle banese, zyre personale, janë ekzekutuar 20 vendime gjykate për lejim kontrolli të materialeve të ndryshme dhe personave të ndryshëm. Janë sekuestruar prova, dokumente të rëndësishme që do i shërbejnë procesit të hetimit.
Sfidat nuk janë të pakta, duke iu referuar materialeve të partive politike që kanë mbërritur në SPAK kemi vënë re që kallëzimet e tyre kanë qenë të paplota dhe shpesh jo të sakta.
SPAK është vendosur në kontakt me denoncuesit e partive politike dhe pas verifikimeve është konkluduar se për çdo problematikë të ngritur nga subjektet politike apo organizatat e shoqërisë civile, SPAK ka bërë verifikimet përkatëse për çdo kallëzim të bërë.
Nevojitet më shumë ndërgjegjësim publik dhe mbështetje më e madhe për denoncimit përmes fushatave informuese dhe garancive ligjore për mbrojtjen e dëshmitarit. Gjithashtu është e nevojshme mbështetja e trajnimit të vazhdueshëm të prokurorëve e hetuesve të BKH-së për trajtuar me efikasitet rastet e krimit zgjedhor. Të shfrytëzojmë më mirë teknologjitë e reja dhe analizat e të dhënave për të identifikuar më mirë rastet e shkeljeve zgjedhore
