Te Tirana nuk ka përfunduar hemorragjia e largimeve. Edhe pse ende nuk ka asnjë fjalë zyrtarisht, duket se dy lojtarë të tjerë mund të mos jenë pjesë e bardhebluve për sezonin e ri. Bëhet fjalë për Gentian Selmanin dhe Gledi Micin.
Paçka se, si njëri, dhe tjetri, kanë qenë të pazëvendësueshëm në fushën e lojës, me gardianin që ka luajtur çdo takim dhe Micin si në fushë dhe jashtë, një lider i vërtetë, shanset që dyshja të jetë pjesë e bardhebluve edhe në sezonin e ri është e vogël.
Në fakt, për Micin kjo histori ishte edhe kampionatin e shkuar, me mbrojtësin që rinovoi nga të fundit. Selmani është pak më ndryshe dhe qëndrimi i tij varet nga trajneri i ri.
Gjithsesi, burime në klub bëjnë me dije se portieri dhe Tirana për momentin janë shumë larg dhe zor se do të ketë edhe një vit tjetër bashkëpunim. Nëse këta dy emra konfirmohen, për Tiranën do të ishin 7 largime.
Admir Bajroviçi, pak ditë më parë ishte lojtari i pestë që largohej zyrtarisht nga 26 herë kampionët. Më parë kanë mbyllur bashkëpunimin Akileu Ndreca, Florjan Përgjoni, Fatmir Prengaj, Romeo Harizaj. Në dyshim janë edhe disa lojtarë të tjerë pa marrëveshje dhe Selmani e Mici mund ta çojnë numrin në 7.
Te Tirana situata nuk është e qartë as me lojtarët e huaj, të cilët janë shumë dhe që duan të largohen për arsye të ndryshme. Ata janë futbollistë si: Abah, Dembele, Jarmouni e ndonjë tjetër.
Të gjithë janë nën kontratë, por për disa prej tyre ka oferta. Me shumë mundësi, Zharmuni dhe Dembele do të shiten në një skuadër më të mirë, ndërsa ende nuk dihet fati i Kolës./Panoramasport
