Emisioni investigativ “Në Shënjestër” i gazetares Klodiana Lala ka publikuar detaje të reja nga dosja hetimore për vrasjen mafioze të 29-vjeçarit Ermir Dedja, i cili u ekzekutua mbrëmjen e 20 majit në Durrës. Dedja u qëllua me breshëri kallashnikovi pas shpine, në një atentat të mirëorganizuar, teksa po hipte në makinën e tij.
Pamjet filmike të siguruara nga një farmaci në afërsi të vendit të ngjarjes ndihmuan hetuesit të identifikonin një automjet të dyshimtë, i cili më pas rezultoi të ishte përdorur nga autorët. Edhe pse zona ku ndodhi krimi ishte pa kamera sigurie gjë që besohet të jetë zgjedhur qëllimisht nga autorët kamerat përreth zbuluan lëvizjet e makinës para dhe pas atentatit.
Sipas dosjes, autorët kishin qëndruar për disa orë në lagjen nr. 18 të qytetit, duke pritur momentin kur Dedja do të ishte vetëm. Ai u qëllua sapo doli nga një qendër shëndetësore dhe po hynte në automjetin e tij. Plumbat kapën edhe fasadën e qendrës, por fatmirësisht nuk pati viktima të tjera.
Në vendin e ngjarjes, Dedja u gjet i pajetë pranë një pakete cigaresh, ndërsa gjatë kontrollit fizik iu gjet edhe një sasi e vogël kanabisi (1.5 gramë). Ai nuk kishte armë me vete, gjë që tregon se nuk ishte i përgatitur për një sulm.
Hetimet zbuluan se 29-vjeçari kishte precedentë penalë, kryesisht në fushën e narkotikëve. Ai ishte arrestuar në vitin 2015 dhe përmendet në një ngjarje të vitit 2017 në Shijak, ku u ndalua si mbështetës i një autori plagosjeje.
Megjithëse Dedja nuk kishte një profil të lartë në botën e krimit, hetuesit dyshojnë se ai ka qenë “ushtar” i ndonjë grupi kriminal në Durrës apo Shijak, zona ku janë të njohura disa prej bandave më të rrezikshme në vend./ Emisioni “Në Shënjestër”
