Gjatë këtyre ditëve të nxehta të muajit qershor, Spitali Psikiatrik i Vlorës ka shënuar një rritje të ndjeshme të numrit të vizitave nga persona me shqetësime të shëndetit mendor, ku numri arrin deri në 30 vizita në ditë. Nga këto, disa pacientë trajtohen edhe në shërbim spitalor.
“Më shumë raste po kërkojnë ndihmë mjekësore, si në qendrën komunitare, ashtu edhe në ambientet e spitalit, i cili mbulon të gjithë jugun e vendit,” tha Stiliano Lepuri, mjek psikiatër në Spitalin Psikiatrik të Vlorës, në një intervistë për Top Channel.
Sipas tij, temperaturat e larta ndikojnë ndjeshëm në gjendjen e pacientëve, sidomos tek ata që vuajnë nga ankthi, sëmundjet kronike mendore, apo janë përdorues të substancave narkotike dhe alkoolit.
“Nuk mungojnë as të rinjtë, të cilët shpesh kërkojnë vizita ose përfundojnë të shtruar për trajtim më të gjatë,” shtoi mjeku.
Aktualisht, në qendrën komunitare të shëndetit mendor kryhen mbi 35 vizita në ditë. Jo të gjitha rastet kërkojnë shtrim, por një pjesë e mirë marrin mjekimin dhe largohen.
Në këtë periudhë janë regjistruar edhe raste të turistëve të huaj që kanë kërkuar ndihmë, kryesisht për përdorim të substancave gjatë qëndrimit në Vlorë, ndërsa dy prej tyre trajtohen spitalor prej disa muajsh.
Mjeku Lepuri apelon për kujdes të shtuar gjatë valës së nxehtësisë, duke rekomanduar që pacientët të shmangin daljet në diell, të marrin rregullisht mjekimet dhe të mos konsumojnë alkool.//TCH
