Prej më shumë se 15 orësh, një zjarr i përmasave të mëdha ka përfshirë kodrat në lindje të qytetit të Himarës, në afërsi të fshatit Pilur. Flakët, të përhapura nga era, kanë djegur shkurre dhe pemë, duke u ngjitur edhe më lart në terrenin malor.
Që nga mesdita e djeshme, në terren ndodhen rreth 15 efektivë zjarrfikës, punonjës të policisë së Himarës, staf i bashkisë dhe emergjencat civile, të cilët po përballen me vështirësi për shkak të terrenerit të thyer.
Për shkak të pamundësisë për të ndërhyrë nga toka, është kërkuar ndërhyrje ajrore, dhe helikopteri ka nisur operacionin që në orët e para të mëngjesit të sotëm.
Ndërkohë, tymi i dendur që përhapet nga vatra aktive është kthyer në një shqetësim serioz për pushuesit në zonë.
