E ardhmja e Nico Williams duket gjithnjë dhe më afër Barcelonës. Sipas raportimeve nga Spanja, klubi katalanas ka arritur një marrëveshje verbale me futbollistin.
Ai ka dhënë miratimin për një kontratë gjashtëvjeçare, ndërsa mbetet të arrihet akordi me Athletic Bilbao-n, klub që zotëron kartonin e futbollistit.
Gjithashtu thuhet se Williams do të përfitojë te Barcelona rreth 12 milionë euro në sezon. Në vitet e fundit, Barcelona ka pasur probleme të shumta financiare dhe mbetet të shihet sesi mund të zgjidhë çështjen, për të paguar klauzolën e Williams.
Për 22-vjeçarin, Athletic Bilbao kërkon të paktën 58 milionë euro, për ta lënë të lirë që të largohet.
