Ka përfunduar procesi i verifikimit të votave për 94 kutitë e Peqinit dhe Gramshit në Qarkun e Elbasanit, të zgjedhjeve parlamentare të 11 Majit.
Hapje e kutive për këto dy bashki u bë vetëm për materialet zgjedhore dhe jo për efekt rezultati, për të vërtetuar fletët e votimit, pasi Partia Demokratike për manipulim të procesit zgjedhor përmes fenomenit të “trenit bullgar”.
Procesverbalet e konstatimit do i vihen në dispozicion Partisë Demokratike që do bëjë analizën e gjetjeve dhe më pas kërkesat që kanë do i paraqesin në seancën e radhës së Komisionit të Ankesave dhe Sanksioneve (KAS), e cila pritet të mbahet ditën e hënë.
Mësohet se gjatë procesit të verifikimit janë konstatuar problematika, ku në 15 raste, fletët e votimit kishin vetëm nga një vulë, ndërkohë që duhet të kishin nga dy vula.
Po ashtu, në kuti janë gjetur më shumë fletë votimit se sa ka qenë pjesëmarrja e zgjedhësve në votime me një apo me dy vota më shumë.
Gjithashtu, janë konstatuar edhe fletë votimi të papërdorura në kutinë e materialeve zgjedhore, më pak se sa janë shënuar në procesverbal. Sipas demokratëve, kjo e dhënë tregon fenomenin e “trenit bullgar”, daljen e fletëve të votimit jashtë qendrave të votimit.
Ndërkohë, ditën e nesërme do të nisë rinumërimi i plotë për efekt rezultati në të dy qarqet me numrin më të lartë të mandateve, Tiranën dhe Fierin, ku do të rinumërohen si votat për partitë, po ashtu edhe votat preferenciale për kandidatët.
