Prej kohësh, drejtuesit e Barcelonës po ndjekin talentin e Porto-s, Rodrigo Mora, duke qenë të bindur se 18-vjeçari do të përshtatej në mënyrë të përkryer me stilin e tyre të lojës.
Por, së fundmi në garë për të siguruar shërbimet e djaloshit portugez është futur edhe PSG, kampioni i Francës është më i avantazhuar për të transferuar Rodrigo Mora në krahasim me katalanasit.
Duke parë “diamantin” që ka në ekip, Porto ka rritur ndjeshëm vlerën e kartonit të tij, duke e çuar në 75 milionë euro, shifër shumë e vështirë për t’u përballuar nga Barcelona, duke ditur që financat e katalanasve nuk janë në gjendjen e tyre më të mirë.
Nga ana tjetër, kampioni i ri i Europës nuk përballet me këtë problem. Të mësuar të investojnë shuma të mëdha në talente të reja, skuadra franceze do të ishte e gatshme të avanconte në negociata duke ofruar një shumë më të lartë se ajo që Barcelona mund të përballojë aktualisht.
Për më tepër, klubi parizien e konsideron sulmuesin portugez si një investim të ardhshëm që mund të ketë një ndikim të menjëhershëm në ekipin e parë nëse ai vazhdon përparimin e tij.
Tashmë dihet që Luis Enrique është një trajner që iu jep shumë hapësirë dhe besim moshave të reja, duke iu dhënë minuta në dispozicion dhe pse jo dhe vendin e titullarit. Gjithsesi, PSG është në fazën fillestare dhe ende nuk ka një ofertë konkrete, por Rodrigo Mora është ndër emrat e parë në listën e merkatos verore të klubit francez.
