Irani i bëri thirrje të hënën Presidentit të SHBA-së, Donald Trump, që ta detyrojë Izraelin të ndalojë sulmet ajrore, ndërsa kryeministri izraelit, Benjamin Netanyahu, tha se vendi i tij ishte në “rrugën drejt fitores”.
Forcat izraelite shtuan bombardimet e qyteteve iraniane, ndërsa Irani dëshmoi se ishte i aftë të depërtonte mbrojtjen ajrore izraelite me një nga breshërit e tij më të suksesshme të sulmeve hakmarrëse me raketa.
“Nëse Presidenti Trump është i sinqertë në lidhje me diplomacinë dhe i interesuar për të ndaluar këtë luftë, hapat e mëtejshëm janë të rëndësishëm”, tha Ministri i Jashtëm i Iranit, Abbas Araqchi, në X.
“Izraeli duhet ta ndalë agresionin e tij dhe, në mungesë të një ndërprerjeje të plotë të agresionit ushtarak kundër nesh, përgjigjet tona do të vazhdojnë. Mjafton një telefonatë nga Uashingtoni për ta mbyllur gojën dikujt si Netanyahu. Kjo mund të hapë rrugën për një kthim në diplomaci.”
Burime i thanë Reuters se Teherani i kishte kërkuar Katarit, Arabisë Saudite dhe Omanit të flisnin me Trump që të përdorte ndikimin e tij mbi Izraelin për të rënë dakord për një armëpushim të menjëhershëm.
Në këmbim, Irani do të tregonte fleksibilitet në negociatat bërthamore, thanë dy burimet iraniane dhe tre burime rajonale.
