Presidentja e Komisionit Europian, Ursula von der Leyen, deklaroi se i ka përcjellë Kryeministrit izraelit Benjamin Netanyahu mesazhin se diplomacia mbetet rruga më e mirë për çështjen iraniane, duke theksuar se Irani nuk duhet të ketë armë bërthamore.
Në bisedën telefonike me Netanyahun, Von der Leyen theksoi se paqëndrueshmëria në rajon buron kryesisht nga Irani dhe se mospërputhjet e tij me kërkesat e IAEA-së i japin Izraelit të drejtën për t’u vetëmbrojtur.
E ndodhur në Kanada për Samitin e G7-ës, ajo paralajmëroi se dronët dhe raketat e prodhuara nga Irani janë një kërcënim i përbashkët për Ukrainën dhe Izraelin, ndaj sipas saj “këto kërcënime duhet të trajtohen së bashku.”
Megjithëse nuk bëri thirrje për armëpushim të menjëhershëm, Von der Leyen nënvizoi nevojën për një qasje të përbashkët dhe të matur në menaxhimin e krizës.
