Java e zyrtarizimeve te Partizani solli Vusal Isgandarlin në ekipin e kuq, ndërsa nga data 10 qershor edhe Xhuliano Skuka vazhdoi stërvitjen me skuadrën. Jo vetëm kaq, pasi të kuqtë po punojnë për transferimin e tretë të bujshëm.
“Panorama Sport” mëson ekskluzivisht se te Partizani janë në tratativa me një mbrojtës nga Kosta Rika. Bëhet fjalë për përforcim në krahun e djathtë, ku të kuqtë nuk kanë alternativa natyrale. Do të jetë transferim me peshë nga përfaqësuesja, që do të vendoset menjëherë nën urdhrat e trajnerit Gega.
Pas largimit të Hadrojt në Ukrainë dhe të Osmanllarit, gjetja e mbrojtësit të djathtë është kthyer në detyrim. Dhe kjo ka bërë që të kuqtë të lëvizin, për ta afruar para fillimit të fazës përgatitore në Ohër. “Demat” nuk do të ndalen me kaq në merkato.
Tjetër repart që shfaq nevojë për alternativa me peshë është i mesfushës. Për këtë drejtuesit po punojnë, ndërsa zgjedhjet nuk do të bëhen të nxituara. Skuadra e Gegës vijon të plotësohet pas disa largimeve.
