Ushtria izraelite ka deklaruar se po vazhdon sulmet kundër lëshuesve të raketave dhe infrastrukturës ushtarake në territorin iranian, në kuadër të një operacioni të gjerë që synon ndalimin e programit bërthamor të Teheranit.
Sipas mediave lokale iraniane, janë raportuar shpërthime të fuqishme në zonën e centralit bërthamor Fordow, pranë qytetit Qom, në jug të kryeqytetit Teheran.
Fordow është një nga qendrat më të mbrojtura të programit bërthamor iranian dhe çdo incident në këtë zonë rrit ndjeshëm tensionet ndërkombëtare.
Shpërthime të tjera janë dëgjuar edhe në veri të Teheranit, duke shtuar shqetësimet për përshkallëzimin e mëtejshëm të konfliktit.
Ndërkohë, mediat ndërkombëtare raportojnë se Izraeli ka vrarë edhe komandantin e Forcës Quds të Gardës Revolucionare, Esmail Qaani.
Ali Khamenei e kishte emëruar Qaani-n si pasardhës të Qasem Soleimani-t , gjeneralit të vrarë në vitin 2020 në Bagdad me urdhër të Presidentit Donald Trump.
Forca Quds shërben si krahu operativ i Gardës Revolucionare Iraniane dhe është gjithashtu përgjegjëse për sulmet terroriste jashtë vendit.
