Real Madrid ka siguruar një tjetër firmë të rëndësishme për të ardhmen e tij, duke firmosur me talentin argjentinas Franco Mastantuono.
Mesfushori me tipare sulmuese do t’i kushtojë Real Madridit 63 milionë euro duke përfshirë edhe bonuset. Mastantuono do të luajë në Kupën e Botës për Klube në Shtetet e Bashkuara këtë verë me River Plate përpara se të transferohet në kryeqytetin spanjoll gjatë muajit gusht.
Mastantuono ka firmosur një kontratë 6-vjeçare që parashikon të jetë pjesë e spanjollëve deri në verën e vitit 2031.
Në moshën 17-vjeçare, Mastantuono, është lojtari më i ri që ka luajtur një ndeshje zyrtare për ekipin kombëtar të Argjentinës në historinë e saj. Mesfushori ka dalë nga akademia e River Plate dhe bëri debutimin e tij me ekipin e parë në janar 2024.
Njoftimi i Real Madrid:
“Real Madrid komunikon se Franco Mastantuono do të jetë një lojtar i klubit tonë për 6 sezonet e ardhshme, nga 14 gushti 2025, deri më 30 qershor 2031.
Mastantuono është rritur në akademinë e River Plate mes 2019 dhe 2024 si është bërë pjesë e ekipit të parë që nga sezoni 2024-2025. Në shkurt 2024, u bë shënuesi më i ri në historinë e River Plejt, skuadër me të cilën fitoi Superkupën e Argjentinës.
Vetëm 17-vjeç, ai u bë lojtari më i ri që ka luajtur një ndeshje zyrtare me përfaqësuesen e Argjentinës në historinë e saj”, shkruhej në njoftimin e Realit.
Mastantuono është blerja e tretë e Real Madridit këtë verë, pas Trent Alexander-Arnold nga Liverpooli dhe Dean Huijsen nga Bournemouth.
Real Madrid gjithashtu emëroi Xabi Alonson si trajnerin e tyre të ri për të zëvendësuar Carlo Ancelottin, pasi dështoi të fitonte një trofe të madh këtë sezon.
