Ambasada amerikane në Irak po përgatitet për një urdhër të mundshëm evakuimi për shkak të rreziqeve në rritje të sigurisë për amerikanët në rajonin e gjerë, raportoi agjencia e lajmeve Reuters , duke cituar një zyrtar irakian dhe një burim të mirë informuar amerikan.
“Shtetet e Bashkuara po përgatiten për një evakuim të pjesshëm të ambasadës së tyre në Irak dhe do të lejojnë personat në varësi të ushtrisë të largohen nga vendet përreth Lindjes së Mesme për shkak të rreziqeve të rritura të sigurisë në rajon, thanë të mërkurën burime amerikane dhe irakiane.
Katër burime amerikane dhe dy burime irakiane nuk specifikuan se cilat rreziqe sigurie kishin nxitur vendimin për evakuim dhe Departamenti i Shtetit nuk iu përgjigj menjëherë një kërkese për koment. Çmimet e naftës u rritën pas raportimit të evakuimit“, raporton Reuters.
Ditën e hënë, ministri iranian i Mbrojtjes, Aziz Nasirzadeh, tha se Teherani do të sulmojë bazat amerikane në rajon nëse negociatat me Uashingtonin mbi programin bërthamor të Iranit dështojnë dhe shpërthen konflikti i armatosur me Shtetet e Bashkuara.
Punonjësit dhe familjet e diplomatëve dhe personelit ushtarak mund të largohen nga ambasadat në Bahrein dhe Kuvajt.
Departamenti i Shtetit po përgatitet të urdhërojë stafin jo-thelbësor të ambasadave dhe familjet e diplomatëve të largohen nga Bahreini dhe Kuvajti, raportoi Associated Press.
Një zyrtar tjetër i tha Reuters se ushtria amerikane do të lejojë familjet e personelit ushtarak që shërbejnë në Bahrein të largohen përkohësisht nga vendi, për shkak të tensioneve në rritje në rajon.
