Për sfidën kualifikuese të Kupës së Botës në Grupin K, gjëja më e bukur e kuqezinjve ishin tifozët. Afro 1 mijë shqiptarë ishin shumë të zhurmshëm në stadium duke dhuruar spektakël.
Pjesë e tyre ishin “Tifozat Kuq e Zi”, që kundër Serbisë nuk ishin në stadiumin e Tiranës pasi Federata Shqiptare e Futbollit (FSHF) i përjashtoi dhe nuk iu siguroi bileta për sektorin e tyre të dedikuar.
TKZ bën me dije se edhe në Riga siguria në stadium kishte urdhëra nga FSHF që ata mos lejoheshin me banderolat.
“Kemi urdhër nga federata juaj t’ju kontrollojmë hollësisht”, shkruan TKZ. “Kjo ishte tentativa e dytë: e para erdhi kur nuk na ndanë fare biletat që, sipas rregullores, u takojnë tifozëve vizitorë. Donin t’i linin karriget bosh për të thënë se “s’kishim tifoza”. shtojnë ata.
Postimi:
“Manovrat penguese të FSHF-së vazhduan edhe dje në Riga. Në hyrje të stadiumit, djemtë tanë u përballën me kontrolle të papara më parë në një transfertë. Steward-et na thanë hapur: “Kemi urdhër nga federata juaj t’ju kontrollojmë hollësisht”.
Me këtë rast, na ndaluan të gjitha banderolat dhe parullat që kishim me vete, edhe pse përmbanin vetëm shkrimet e zakonshme “Tifozat Kuq e Zi” dhe “TKZ on Tour”. Ato me mesazhe, sigurisht që i futëm brenda.
Kjo ishte tentativa e dytë: e para erdhi kur nuk na ndanë fare biletat që, sipas rregullores, u takojnë tifozëve vizitorë. Donin t’i linin karriget bosh për të thënë se “s’kishim tifoza”.
E dimë mirë me kë kemi punë – me miqtë e shkijeve. Por le ta mbajnë mend: koha mund të jetë e maskarenjve, po Atdheu mbetet i Shqiptarëve.
Shihemi përsëri së shpejti.
Tifoza Kuq e Zi
O sa mirë me qenë Shqiptar”, shkruan TKZ.
Përplasjet mes FSHF-së dhe TKZ-së kanë muaj që vijojnë, fill pasi UEFA i dha dritën jeshile bashkorganizimit të Euro 2027 për 21-vjeçarët mes Shqipërisë dhe Serbisë.
TKZ ishte kundër këtij organizimi me Serbinë dhe i doli kundër FSHF-së dhe kreut të saj, Armand Duka, me protesta.
Pas këtyre ndodhive TKZ humbën vendin e dedikuar në stadium dhe gjithashtu për anëtarët e tyre nuk ka më bileta.
