Nga Basir Çollaku
Nën emrin zgjedhje, më 11 maj u zhvillua një nga eksperimentet e genocidit elektoral, me emrin votë në Shqipëri, të pa hasur kund tjetër. Me vëmendje të mbushur e me mjaft prova, fakte, video e dëshmi, ajo e diel e ktheu vendin në një terminal trenash mbi e nën tokë. Një lëvizje lokomotivash e vagonash, ku pasagjerët e lejuar ishin mashtrimi, manipulimi, presioni, shantazhi, kanosja e blerja. Ndërsa drejtues dhe ekzekutues, ishin qeveria, Rilindja si dhe ortakëria e tyre e paligjshme.
Treni bullgar
Ishte sistemi më dërrmues në ditën e procesit, u bë funksional fizikisht. Por ishte i hartuar me shumë kujdes nga komisionerë, vëzhgues dhe ustallarë të PS, të cilët dinin me detaje operacionin e koduar “plaçkit çdo votë”, duke kontrolluar çdo detaj e lëvizje. Fletët e votimit të plotësuara u jepeshin votuesve jashtë, nga celula e partisë. Ata nxirrnin të paplotësuarën në kthim dhe shifrat trasheshin tej imagjinatës deri në mbyllje të kutive. Kishte dhe fletë të printuara larg KQZ me ngjyrë e trashësi ndryshe, në plotësimin e skemës.
Treni kolumbian, ekuadorian, venezuelian, brazilian
Këta janë trenat kryesorë të financimit të fushatës së mazhorancës, ku aksionerët kryesorë të mjeteve të transportit ishin suel çelët, çyrbet, bajrët, hajrët, doçët, troplinët e të tjerë miq të pushtetit, në defterët e DEA, DIA, Europol, por me licencë të qeverisë së Ramës, për të qarkulluar e punuar kudo.
Trenat londinezë, holandezë, dubait, belgë e spanjollë
Janë binjakë të atyre kolumbianë, por të përzier me shtëpitë e barit dhe investime të shtuara në pastrimin e parave në Shqipëri. Ata kanë qenë pjesë e patronazhimit të qendrave të votimit, muaj para datës 11, me asistencën financiare e njerëzore, ashtu siç u ishin përcaktuar më herët detyrat nga pushteti. Mbanin në mbikqyrje këdo luhatej dhe kishte shenja braktisjeje të votimit ndryshe.
Trenat e qeverisë
Realisht kjo është fabrika e prodhimit si dhe licencimit të të gjithë trenave. Krijuesi dhe makinisti ka emrin e kryeministrit Rama.
Trenat e lokalë
Ndonëse konsiderohen trena lokalë, ishin operacionalë dhe me fuqi të madhe për trevat ku kishin zonën e qarkullimit. Ishin trena bashkiakë, të cilët kishin gjithë administratën pasagjere me laps e letër në dorë, për të plotësuar numrat dhe kuotat e caktuara nga makinisti i zonës, bashkiaku, në dakordësi me kandidatët përkatës. Këtu niste nga mbledhja e kartave, punësimet elektorale, ndihma ekonomike, investimet zgjedhore e çdo lloj shërbimi privat me para publike. Nuk mungonin produkte si, kanosja e shantazhi për punë, ushqim e çdo shërbim tjetër. Kishte në këtë soj treni edhe vagona për familjarët, pa harruar ata banues jashtë në emigrim, por pjesë e listës.
Trenat e polici-drejtësisë
Mund të quhen trena mbështetës për të gjithë trenat e tjerë. Një lloj garancie për të vjedhur vota pa trazuar, për të transportuar para pa të sulmuar ndonjë rival apo kundërshtar, njëherësh për të mos nisur procedime penale në raste flagrance derisa ftohja ta dërgonte në harresë rastin.
Trenat e oligarkëve
Këta janë më industrialë se të tjerët. Përveç punonjësve të cilët kishin marrë mesazhet e duhura, ku duhej të shënonin kryqin apo plusin, këta ishin njëherësh edhe lubrifikuesit e ortekut levizës të fushatave. Paraja kurrë nuk fle. Zarfet e tyre shkonin rregullisht. Ata u shtonin miliona eurove narcos, pjesën e tyre konkuruese dhe sistemi nuk ankohej për boshllëk duke mbajtur dhe kursin e këmbimit në nivelet e një leku të fortë.
Trenat diplomatikë
Këta thuajse ishin bosh para dhe gjatë zgjedhjeve dhe mund të ishin sehirxhinjtë madhorë nëpër hije apo oaze pushimi. Ndoshta edhe ata kanë qenë nën patronazhim të hollësishëm, për të frymëzuar reagimet post-elektorale. Vëzhgues të huaj kanë pasur një trysni të madhe nga pushteti për të koordinuar tekstin fundor të monitorimit elektoral. Ky ende është një vagon i hapur, pasi ndërkombëtarët jashtë Shqipërisë, kanë qenë më të sertë se herët e tjera, së paku deri tani.
Stacioni i SPAK
Mendohej se do vinte një kontroll mbi të gjitha shinat, ku shkelnin gjithë këto trena numëruar më sipër. Por asgjë ashtu siç u tha dhe u zhurmua. U bë më tepër një teatër i vakët, me skenarë zgjedhjet e 2017 dhe 2021, shkrues e vënës në skenë Edi Ramën, aktorë të vjetër e të rinj të njohur, duke mos prodhuar ndonjë akt ndryshe. Struktura me kokë nga zgjatja e mandatit, e la veten në dorë të Irenës.
Treni i opozitës
I sapo dalë nga reaminacioni ku e dërgoi investimi kriminal qeveritar, për ta lënë pa binarë, bëri përpjekje të shumta, falë Berishës, për të sjellë rrugë ndryshe. Por kishte tek-tuk edhe pasagjerë që më tepër kujdeseshin për bileta që nuk i nxirrnin nga vagonat e lakmuar…
