Është mbajtur këtë të martë seanca e radhës në GJKKO me dëshmitë e të penduarit të drejtësisë, Erion Alibej, klu ka rrëfyer se për vrasjen e Dorjan Shkozës ka paguar 100 mijë euro. Armët, sipas tij, ishin blerë tek një hoxhë në Tiranë, përmes ndërmjetësimit të Sandër Bahos.
Ai tha se pas vrasjes së Dorjan Shkozës ka mbajtur kontaktet me Nuredin Dumanin, nëse do të bëhej “i gjallë” Talo Çela apo jo, një prej shënjestrave kryesore të grupit të tyre. Alibej rrëfeu se Klevis Alla kishte parë një ditë Talo Çelën tek banesa e vëllzërve Haxhia në Durrës, të cilët po ashtu janë ekzekutuar, por sipas tij, Nuredin Dumani e kishte marrë me rezerva.
“Për Dorjan Shkozën kam paguar 100 mijë euro, nga hoxha jan blerë disa armë, varionin çmimet nga 500-1000 deri 3500 euro. Nuk e di fiks se kontaktet me “hoxhën” i kishte Sandër Baho. Me Nuredin Dumanin jam takuar pas vrasjes së vëllezërve Haxhia. Por me Nuredinin isha në kontakt të vazhdueshëm, Henrik Hoxhën s’e njifja, vetëm kam degjuar që kishte pseudonimin “kusho” edhe “nipi” që i drejtohej Klevis Allës. Me Nuredinin flisja per Talo Çelën që pas vrasjes së Dorjan Shkozës do u bënte i gjallë apo jo. Gjithashtu vijoja investigimin për Altin Ndocin, ky shkonte shpesh në Durrës tek vëllezërit Haxhia. Klevis Alla kishte parë një ditë Talon tek shtëpia e vëllezërve Haxhia, por Nuredini e mori me rezerva. Nuredini është angazhuar me qen, i përgatitur me “çunat e Fushë-Krujës”, por emrat e tyre s’i dija.
Ja dhashë makinën dhe armët te pazari i Rrogozhinës, ishte me Klevis Allën kur i mori. Më pas, Nuredini kërkoi dhe 50 mijë euro. Ia çova me një mikun tim. Ia dhashë gjithsej 150 mijë euro, që të shikonte që kisha lek dhe të kishte besim.” – tha Erion Alibej.
Gjatë dëshmisë, Alibej zbuloi komunikimet në platformën “Sky Ecc” me Plarent Dervishaj, si dhe kodet që ky i fundit përdorte në rrjetin e enkriptuar.
“Në Sky ECC më shkuan Plarent Dervishi (kunati i Lulzim Berishës në Durrës), kam pasur kontakt me të, ai kishte kodet “barcelona” dhe “gost”. Plarenti me tha “m’bohet qefi që e ke gjet Talo Çelën”, unë u habita nga e dinte ky, pastaj u kujtova që Plarenti kishte shumë muhabet me Festim Qolin. Kishim një makinë “Toyota” të vjedhur që e kisha ble në Shijak, ja dhashë Nuredinit dhe armët që ai donte, ja dhashë tek pazari i Rrogozhinës, ishte me Klevis Allën kur e mori, më pas Nuredini kërkoi dhe 50 mijë euro, ja çova me një mikun tim dhe i çova 150 mijë për të vijuar. Këtë e bëra që dhe Nuredini të shikonte që unë kisha lekë dhe të kishte besim.” – tha Alibej
Lidhur me vrasjen e vëllezërve Haxhia, Alibej deklaroi se i kishte dhënë dy kallashnikovë dhe një pistoletë Dumanit. Plani fillestar, sipas tij, ishte për të vrarë Altin Ndocin dhe Besmir Haxhinë, por viktimë e paplanifikuar mbeti edhe Viktori. Ai sqaroi se kishte marrë vesh për identitetin e viktimave nga lajmet televizive dhe se më pas kishte komunikuar me Dumanin për detajet e atentatit.
“I thashë Nuredinit pse kishte shenja gjaku në makinë. Më tha: kemi qëlluar me xhama mbyll dhe nga ciflat është lënduar ‘Kusho’. Më pas u shoqërua ‘Nipi’ në polici dhe Nuredini më tha: ‘Më duket se ky po flet’. E mori vesh nga komshinjtë, nga ‘Miri Pojes’, që e kishte mik”, përfundoi dëshminë Alibej.
