Gazetari Armand Shkullaku ka akuzuar se SPAK merr urdhrat nga Rama se kë duhet të hetojë.
Shkullaku u shpreh se, SPAK nuk heton krimin zgjedhor dhe procedurat korruptive dhe me këtë Edi Rama mban pushtetin dhe SPAK merr ato superrroga dhe privilegje.
“Çdo veprim i SPAK për dy figura të larta, pas Veliajt, Arben Ahmetaj dhe Erion Veliaj, ka patur lejen ti dënojë, ti degjenerojë dhe moralisht, si tradhëtarët jo të PS-së, por tradhtarë të besimit të sulltanit.
Këta të dy, mbrapa shpinës së tij kanë kurdisur gjithë këto gjëra, kanë rënë viktimë e grave të tyre dhe janë tunduar dhe rrugës kanë ngatërruar qëllimin për të cilin u ka dhënë Rama besimin.
Një pushtet si ky i Ramës, që bën 16 vite në ekzekutiv, pa llogaritur vitet e tjera në pushtet, përveç shpartallimit, blerjes, diversionit, eliminimit të kundërshtarit ka nevojë që turmave herë pas here tu japë viktima të nivelit të lartë, që të krijohet ideja se këtu po bëhet një vetëpastrim nga drejtësia që ka bërë Edi Rama.
Në fakt ky nuk është vetëpastrim, sepse unë them se sa më gjatë të rrijë Rama, aq më të shtrenjta do jenë kokat që do japë, do shohim kur të vijë koha.
Enver Hoxha e filloi me Feqor Shehun dhe përfundoi tek Mehmet Shehu.
Veliaj e kuptoi vonë, por është viktimë e kësaj gjëje. Veliaj kujtonte se e kishte futur Olsi Dado në burg.
Rama, Ilir Beqajn u mundoi ta mbronte, por për këto gjykata mori guximin ti kthejë çështjet dhe ti akuzojë për grup kriminal. Por këta i heton SPAK se këta aq e kanë vlerën, nuk shkojnë dot më shumë se vetja e tyre.
SPAK-u e ka marrëveshjen në distancë me Edi Ramën. Ata marrin superrogat e tyre dhe privilegjet dhe Rama mban pushtetin.
Dy janë kolonat që SPAK nuk i prek, krimi zgjedhor dhe procedurën korruptive, këto nuk i prek. Pra merret me brekët dhe vibratorët, por nuk merret me vendimet, si u arrit leja, kur u bë mbledhja e VKM, pse këtë e bëtë pa tender, pse i dhatë bonus një kompanie që nuk ekziston, si i dhatë 19 VKM brenda 1 dite, ku i gjeti lekët kompania, si ka mundësi që dy njerëz të panjohur marrin monopolin e inceneratorëve në Shqipëri, kush janë këta drejtorët e 5D, kush i ka përzgjedhur, kush ka qenë te shtabi i Erion Veliajt në zgjedhje, ku janë pamjet filmike, si kanë lëvizur transaksionet bankare.
Këto SPAK nuk i heton. Këto janë për të vjedhur vota.
Kur vjen te vjedhja e votave, rasti më flagrant është rasti i Troplinëve në Durrës’, tha Armand Shkullaku gjatë bisedës në SYRI TV.
