Rusia ka deklaruar se do të ishte e gatshme t’i ofronte azil politik miliarderit Elon Musk, drejtorit ekzekutiv të Tesla dhe X, në mes të mosmarrëveshjes së tij shpërthyese me presidentin e Shteteve të Bashkuara të Amerikës Donald Trump .
Oferta vjen nga nënkryetari i Komitetit të Çështjeve Ndërkombëtare të Dumës Shtetërore Ruse, Dmitry Novikov, i cili e bëri këtë deklaratë për median shtetërore ruse “TASS“.
“Mendoj se Musk luan në një ligë krejtësisht të ndryshme, kështu që ai nuk do të ketë nevojë për azil politik, megjithëse nëse do të kishte, Rusia, sigurisht, mund t’ia ofrojë atë”, tha Novikov.
Tensionet midis Musk dhe Trump, ish-aleatë politikë, veçanërisht për shkak të shkurtimeve të shpenzimeve federale kanë qenë publikisht të larta këtë javë. Pika e kthesës erdhi më 5 qershor, me një shkëmbim akuzash në mediat sociale dhe deklarata për median.
Konflikti u nxit nga “Një Projektligj i madh dhe i bukur” i Trump, i cili përfshin një zgjatje të shkurtimeve të taksave dhe përparësi të reja buxhetore si siguria kufitare. Musk ka shprehur shqetësim për ndikimin e tij në borxhin kombëtar.
Deklaratat vijnë në një kohë tensionesh të larta midis Uashingtonit dhe Moskës, ndërsa negociatat për armëpushim midis Rusisë dhe Ukrainës mbeten të bllokuara.
Raundi i fundit zgjati vetëm 90 minuta, me pak përparim përtej një marrëveshjeje për shkëmbimin e të burgosurve. Ndërkohë, Kremlini po e ndjek nga afër përçarjen midis dy prej figurave më me ndikim në botën politike dhe ekonomike globale.
