Në zgjedhjet presidenciale të Koresë së Jugut, ka fituar kandidati i opozitës, Lee Jae-myong.
Kjo fitore e tij, vjen disa muaj pas përpjekjes së dështuar të paraardhësit të tij, Yoon Suk Yeol, për të vendosur ligjin ushtarak në vend. Rivali i tij kryesor ishte kandidati i partisë në pushtet, Kim Moon-soo.
Ky i fundit ka qenë prapa Lee-së për javë të tëra në sondazhe, ndërsa e përgëzoi atë për fitoren, raporton BBC. Sakaq, Lee nuk e shpalli fitoren, por e la të nënkuptohej, teksa u shpreh se rimëkëmbja e demokracisë së Koresë së Jugut, do të jetë përparësia e tij.
Zgjedhjet e sotme presidenciale ishin të parakohshme, pasi ish-presidenti Yoon Suk Yeol u shkarkua nga posti në muajin prill pas akuzave për një përpjekje për shpalljen e ligjit ushtarak. Ky veprim shkaktoi tronditje të thellë në politikën vendase.
Fitorja e Lee, bën që ky i fundit të përballet me sfida të mëdha: një vend të ndarë politikisht, tensione me Shtetet e Bashkuara për shkak të tarifave tregtare dhe një marrëdhënie të pasigurt me presidentin amerikan Donald Trump.
