Një operacion i shërbimeve ukrainase e gjeti Rusinë të papërgatitur. Mbi 40 avionë bombardues të aviacionit rus u dëmtuan ose u shkatërruan, duke i shkaktuar Rusinë një prej humbjeve më të mëdha që prej fillimit të luftës.
Zbulimi i Ukrainës, i njohur si SBU, njoftoi se sulmet ndodhën thellë brenda territorit të Rusisë në pesë rajone të ndryshme nga Siberia Lindore deri në kufirin perëndimor. Mes avionëve të shkatërruar dhe dëmtuar janë ata të modelit Tu-95 dhe Tu-22 M3 dhe një avion i sofisitikuar radarësh model A-50.
Aeroportet ushtarake ruse thanë se i zmbrapsën sulmet dhe se disa avionë morën zjarr si rezultat i veprimit ukrainas.
Shërbimi i Sigurisë së Ukrainës (SBU) tha se sulmi i së dielës goditi 34% të bombarduesve strategjikë të Rusisë të aftë për të mbajtur raketa balistike. Janë këta avionë bombardues që terrorizojnë çdo natë qytetet ukrainase.
Në një postim në mediat sociale, SBU tha se “Operacioni Rrjeta e Merimangës” i kushtoi Rusisë 7 miliardë dollarë. “Po bëjmë gjithçka që mundemi për ta larguar armikun nga toka jonë! Do t’i godasim në det, në ajër dhe në tokë. Nëse është e nevojshme, do t’i nxjerrim nga nëntoka”, tha SBU në një postim në Telegram.
Burimet ukrainase thanë se operacioni në fjalë është përgatitur për një vit. Dronët sulmues janë pajisur me teknologji të inteligjencës artificiale. Sistemet u trajnuan në disa muze ukrainas ku ndodhën avionë bombardues të epokës sovjetike.
Dronët u futën kontrabandë në Rusi nëpërmjet disa kamionëve. Pamjet në rrjetet sociale treguan se pasi arritën në destinacion nga kamionët filluan të dalin njëri pas tjetrit dronët që sulmuan bazat ruse.
Në reagimin e tij pas sulmit, presidenti i Ukrainës, Volodymyr Zelensky, e quajti aksionin “të shkëlqyer” dhe “të arritur vetëm nga Ukraina”. Shtëpia e Bardhë nuk u informua për sulmin.
“Një vit, gjashtë muaj dhe nëntë ditë nga fillimi i planifikimit deri në ekzekutimin efikas”, vazhdon ai. “Operacioni ynë më afatgjatë. Njerëzit tanë të përfshirë në përgatitjen e operacionit u tërhoqën nga territori rus në kohë”. Pas operacionit Zelensky u takua me kreun e Shërbimit të Sigurisë së Ukrainës (SBU), Gjeneral Vasyl Maliuk.
Në Kiev sulmi ndaj Rusisë u prit plot krenari. “Mendoj se do të ketë ndikim të madh… mund ta kthejë [Rusinë] me këmbë në tokë dhe të na japë një lloj lehtësimi,” thotë Pavlo Fesenko duke folur për agjencinë e lajmeve Reuters.
Sulmi ndodhi në vigjilje të bisedimeve të paqes në Stamboll. Delegacioni rus mbërriti të dielën në mbrëmje. Këto pamjet të transmetuara nga rrjeti televiziv rus Russia-24 tregoi kreun e delegacionit, Vladimir Medinsky, duke dalë nga avioni me të mbërritur.
