Presidenti francez Emmanuel Macron ka deklaruar se tensionet mes Shteteve të Bashkuara dhe Kinës përbëjnë kërcënimin më të madh me të cilin përballet sot bota.
Ai ka theksuar nevojën për krijimin e aleancave të reja në rajonin Indo-Paqësor, gjatë një vizite zyrtare në Singapor.
Në fjalën e tij në forumin e sigurisë Shangri-La Dialogue, Macron u shpreh se Franca synon të forcojë bashkëpunimin me vendet e Azisë për të ruajtur stabilitetin global, në një kohë kur marrëdhëniet SHBA-Kinë janë në pikën më të tensionuar.
“Do jem i qartë: Franca është mike dhe aleate e Shteteve të Bashkuara dhe, gjithashtu, një partnere bashkëpunuese me Kinën – edhe kur kemi mosmarrëveshje apo konkurrencë mes nesh”, tha Macron.
Sipas presidentit francez, ekziston një interes i përbashkët midis Azisë dhe Evropës për të parandaluar shpërbërjen e rendit ndërkombëtar.
“Epoka e mos-rreshtimit ka përfunduar, por kemi hyrë në epokën e ‘aleancave të veprimit’. Kjo do të thotë se vendet që duan të veprojnë së bashku duhet të pajisen me mjetet e nevojshme për ta bërë këtë”, shtoi ai.
Vizita e Macron në rajonin e Indo-Paqësorit vjen në një kohë kur Franca dhe Bashkimi Evropian po kërkojnë të forcojnë lidhjet tregtare me Azinë, si kundërpeshë ndaj pasigurive që shkakton politika tarifore e presidentit amerikan Donald Trump.
Lëvizja e presidentit francez pason një seri vizitash të ngjashme nga liderë të vendeve si Kina, Japonia dhe shtete të tjera evropiane, duke theksuar rëndësinë strategjike të Azisë Juglindore në mes të krizave globale që po prekin zinxhirët e furnizimit dhe tregtinë ndërkombëtare.
