Nënpresidenti amerikan Mike Pence ka paralajmëruar liderin koreano-verior Kim Young-un se do të ishte një gabim fatal për të nëse do të “luajë” me Donald Trump, sa i përket pjesëmarrjes në takim muajin e ardhshëm.
Takimi mendohet të mbahet në Singapor, por sinjalet që mbërrijnë nga Uashingtoni dhe Peniani tregojnë se Kimi dhe Trumpi kanë përplasje mbi termin “denuklearizim”. Koreja e Veriut ka kërcënuar të tërhiqet nga bisedimet nëse zyrtarët amerikanë nuk zbrapsen nga linja e ashpër e pozicionit të tyre negociues.
Pence në një intervistë për Fox News ka thënë se “do të ishte gabim shumë i madh për Kim Jong-unin nëse mendon që mund ta mashtrojë Donald Trumpin”.
Koreja Veriore ka kërcënuar me largim nga ky takim, pas komenteve të Këshilltarit për Siguri Kombëtare në Shtëpinë e Bardhë, John Bolton, i cili ka përmendur ndër të tjera edhe “modelin” e Libisë për denuklearizim.
Ndërkohë, amerikanët e kanë deklaruar vazhdimisht se presin që Koreja e Veriut të pranojë në takim çarmatimin e saj të plotë, të verifikueshëm dhe të pakthyeshëm, sepse Uashingtoni nuk do të pranojë asgjë më pak se kaq.
