Pas humbjes së mandatit për deputet, kandidati i PD, Ilir Alimehmeti tha për emisionin “Të Paekspozuarit” në MCN se sistemi zgjedhor është një model që i shërben vetëm liderëve për të mbajtur pushtetin, duke larguar zgjedhësit dhe demotivuar pjesëmarrjen e tyre.
Ai tha se ky sistem ka krijuar një parlament të dobët dhe ka ulur interesin për politikën, sidomos te të rinjtë.
“Sistemi zgjedhor ka mbajtur qeverinë e kaluar. Jam i qartë për këtë çështje, sepse duhet të jemi konkretë. Ky sistem zgjedhor është një lloj hibrid, por ai largon zgjedhësin nga të zgjedhurit. Ai deformon vullnetin dhe shumë pak njerëz do të përfaqësohen në parlament nesër nga të gjitha palët. Ky është realiteti ynë.
Në një fjali, ky është një model që liderët e përcaktojnë për veten e tyre, për t’u siguruar pozitat dhe për të mbajtur pushtetin. Por kjo është e thjeshtë për t’u kuptuar. Unë flas nga perspektiva e njerëzve të thjeshtë. Nga ana e liderëve, është e vërtetë që sistemi u favorizon ata. Por për njerëzit, ky është një sistem i keq. Pse? Sepse e demotivon njeriun që të shkojë të votojë, të marrë pjesë në politikë dhe e largon gjithmonë nga procesi politik.
Kjo ndodh prej dy dekadash dhe gradualisht po u merr njerëzve fuqinë vendimmarrëse. Në fund të fundit, fuqia e njerëzve jepet vetëm një herë në katër vjet me votë. Por kur kjo fuqi u hiqet gradualisht, njerëzit humbasin interesin. Pastaj thonë se qytetarët dhe të rinjtë nuk janë të interesuar për politikën, por në të vërtetë ne jemi larguar vetë nga demokracia. Ky është problemi.
Problemi tjetër është se një sistem i tillë prodhon një parlament të dobët. Ne e kemi parë rënien e cilësisë së parlamentit në 20 vitet e fundit. Nuk është se askush nuk ka menduar për këtë, por unë jam këtu sot, ndërsa 20 vjet më parë nuk isha.”
