Policia e Qarkut të Shkodrës ka vijuar operacionin e koduar “Koordinata”, për goditjen e tentativave për kultivim të bimëve narkotike, ku ka zbuluar dhe asgjesuar 625 bimë kanabisi sativa.
Më konkretisht, gjatë kontrolleve të territorit, raportohet se në territorin e njësive administrative Postribë dhe Rrethina janë zbuluar dhe asgjesuar 188 bimë narkotike kanabis sativa.
Në vijim të veprimeve për këto dy raste bëhet me dije se ka nisur procedimi në gjendje të lirë, për shpërdorim të detyrës dhe moskallëzim krimi, për kryeplakun e fshatit Drisht shtetasin V. D., kryeplakun e fshatit Kir, shtetasin S. H., dhe Inspektorin e Pyjeve, shtetasin A. M.
Ndërkohë, në Malësi të Madhe, janë gjetur në territorin e njësive administrative Gruemirë dhe Kastrat 142 bimë kanabisi.
Ndërsa në Vaun e Dejës janë gjetur 295 bimë kanabisi gjatë kontrolleve në territorin e njësisë administrative Shllak.
Nuk ka asnjë të arrestuar apo shpallur në kërkim si autor të kësaj veprimtarie kriminale, teksa Policia e Shkodrës thotë se po vijon punën për identifikimin dhe kapjen e tyre.
