Ka nisur konferenca e përbashkët për shtyp mes kryeministrit Edi Rama dhe presidentit francez Emmanuel Macron, i cili ndodhet për një vizitë zyrtare në Shqipëri.
Gjatë fjalës së tij, kryeministri Rama deklaroi se në takimin me presidentin Macron është diskutuar edhe për mundësinë e përfshirjes së Francës në projektin e ndërtimit të linjës hekurudhore Durrës-Prishtinë.
“Folëm me presidentin për mundësinë e përfshirjes së Francës në ndërtimin e hekurudhës Durrës-Prishtinë. Më vjen shumë mirë, sepse kjo është diçka sa e vogël në përmasë, aq kuptimplotë në marrëdhënie”, tha Rama.
Kreu i qeverisë kujtoi gjithashtu vizitën e mëparshme të presidentit francez në Shqipëri, kur ndodheshin në shtëpinë e ish-diktatorit Enver Hoxha, e cila atëherë ishte në proces transformimi në një qendër kulturore.
“Sot do të jetë kënaqësi ta shoqëroj presidentin për ta parë këtë projekt në veprim. Praktikisht, kurba e transformimit nga një ngrehinë e degraduar e mbetur nga e shkuara, në një qendër që i jep energji të ardhmes, është simbol i marrëdhënies mes dy vendeve,” theksoi Rama.
Ai shtoi se Franca është sot një partner i besueshëm dhe i qëndrueshëm i rajonit në proceset e integrimit dhe transformimit.
“Folëm me presidentin për mundësinë e përfshirjes së Francës në ndërtimin e hekurudhës Durrës-Prishtinë.
Më vjen shumë mirë, sepse kjo është diçka sa e vogël në përmasë aq kuptimplotë në marrëdhënie, që kur presidenti erdhi këtu herën e kaluar ishim në shtëpinë e ish diktatorit Hoxha që ishte zbrazur e po niste puna për ta shndërruar në qendër kulturore. Sot do të jetë kënaqësi ta shoqëroj presidentin për ta parë tanimë në veprim këtë projekt dhe praktikisht kurba e transformimit nga një ngrehinë e degraduar e mbetur nga e shkuara në një ngrehinë që i jep energji të ardhmes, është simbol i marrëdhënies. Sot e ndjejmë afër Francën edhe në procesin e integrimit, rajoni ka fituar një mbështetës besnik e të qendrueshëm në të gjitha proceset transformuese”, tha ai.
