Komisioni i Ankimeve dhe Sanksioneve (KAS) ka pranuar kërkesën e Partisë Socialiste për numërimin e votave të diasporës të ardhura nga Greqia.
KAS ka rrëzuar vendimin e Komisionerit Shtetëror të Zgjedhjeve, i cili e kishte pezulluar numërimin e zarfave me vota të ardhura nga Greqia, pas ankesave të demokratëve, të cilët pretendonin për abuzime nga ana e socialistëve.
“Pas dëgjimit të pretendimeve dhe konkluzioneve përfundimtare të palëve, KAS u tërhoq për vendim dhe me shumicë votash vendosi pranimin e kërkesës ankimore të PS, konstatimin e pavlefshmëri absolute të vendimit të KSHZH për administrimin e zarfit B, pjesë përbërëse e dokumentacionit të votimit nga jashtë në rastin kur ai nuk vlerësohet nga KNVJ dhe KANVVJ. Kundër këtij vendimi mund të behet ankim në Kolegjin Zgjedhor deri në 5 ditë nga shpallja e tij”, – tha kreu i KAS.
Gjatë seancës së sotme në KAS, përfaqësuesi ligjor i PD u shprehur se vendimi i KQZ për veçimin e votave të diasporës së Greqisë është i duhur duke marrë parasysh problematikën që ka.
“PS e ka të qartë që PD-ASHM nuk do të lejojë asnjë zarf që vjen nga Greqia të numërohet, derisa të provohet se është marrë personalisht nga zgjedhësi. Kur të provohet kjo, le të numërohet, le të vlerësohet. Po thasë të mbushura nga patronazhistët e PS nuk do të lejojmë të numërohen edhe sikur të jetë gjëja e vetme për të cilin angazhohemi në këtë fazë gjatë numërimit të votës së diasporës”, tha Logu.
Gjithsesi, pretendimet e PD-së nuk janë marrë parasysh nga Komisioni i Ankimeve dhe Sanksioneve, i cili ka vendosur që votat e ardhura nga Greqia të numërohen.
Kujtojmë se Komisioneri Shtetëror i Zgjedhjeve, Ilirjan Celibashi, duke marrë shkas nga rezervat e shprehura nga koalicioni Partia Demokratike-Aleanca për Shqipërinë Madhështore lidhur me fletët e votimit nga jashtë të mbërritura nga Greqia, që sollën dhe ndërprerjen e numërimit të votave të ardhura nga diaspora, vendosi që kur grupi numërimit dhe Komisioni i Administrimit e Numërimit dhe Vlerësimit të Votave nga Jashtë për votuesit nga jashtë nuk vlerëson zarfin/et “B”, atëherë këto fletë votimi apo zarfe do të vlerësohen nga KQZ rast pas rasti. Por, ky vendim u rrëzua nga KAS.
