Një banesë është përfshirë nga flakët mëngjesin e martës në fshatin Rrilë të Lezhës. Dyshohet se shkak i zjarrit ka qenë një shkëndijë elektrike.
Banesa një katëshe në pronësi të shtetasit Ndrec Rrushaj, ka pësuar dëme materiale, duke djegur tërësisht orenditë dhe pajisjet e brendshme. Sipas informacioneve nga vendngjarja, fatmirësisht asnjë prej anëtarëve të familjes nuk ka marrë lëndime, pasi ata kanë arritur të dalin në kohë jashtë banesës.
Pavarësisht ndërhyrjes së shpejtë të forcave zjarrfikëse, ka qenë e pamundur të parandalohet djegia e plotë e banesës.
Grupi hetimor është duke shqyrtuar çdo mundësi për të zbardhur rrethanat e plota të këtij zjarri të papritur, ndërkohë që specialistët po punojnë për të vlerësuar dëmet materiale dhe për të identifikuar shkakun përfundimtar të tij.
