Deputeti i Partisë Demokratike, Asllan Dogjani ka denoncuar disa shkelje serioze gjatë procesit zgjedhor, përfshirë: përdorimin e administratës shtetërore për të ushtruar presion mbi votuesit, intimidimin e qytetarëve nga drejtues të institucioneve publike brenda qendrave të votimit, si dhe manipulimin e votës përmes identifikimit të saj në fletën e votimit.
Ai cilëson se dhe vetë ai është kërcënuar nga këta individë të administratës edhe pse ishte më shumë se 150 metra larg qendrave të votimit dhe nuk kishte një shkelje të ligjit.
Dogjani cilësoi se raporti i OSBE-ODIHR ishtë realiteti i asaj ç’ka ndodhi ditën e djeshme në terren me procesin e votimit dhe patronazhistët.
“Pashë se në fletët e votimit, kur kanë votuar qytetarët, është identifikuar vota, sepse ajo nuk është vendosur në kutinë e votimit, por pranë emrit të kandidatit apo mbi siglën e partisë. Ne kemi kërkuar që kjo të shpallet e pavlefshme, por KZAZ e ka marrë në konsideratë.
Kjo përbën lexim të votës, që do të thotë se është përdorur para ndaj këtyre personave për të identifikuar votën.
Problemi më i madh ishte dje, gjatë ditës së votimit. T’ju them sinqerisht, më dukej vetja sikur ishim në luftë. Administrata e bashkisë dhe e shtetit ndodheshin në çdo vend. Votuesit janë kërcënuar nga punonjës të administratës, të cilët ishin të pajisur me autorizime dhe ndodheshin në QV.
Kur një qytetare shkon për të votuar dhe sheh drejtorin e ujësjellësit apo të energjisë elektrike, sigurisht që ndjehet e intimiduar.
Unë vetë e pashë kur shkova në qendrën e votimit. Mua më kërcënuan, edhe pse isha në hyrje të shkollës, 150 metra larg. Më thanë: “Ke hyrë”, sikur të kisha shkelur kufirin. Imagjino kur ai më kërcënonte mua, ‘kjo është vepër penale’. Ai ishte një bandit.
Këtu janë përdorur para, janë intimiduar qytetarët, është përdorur e gjithë administrata. Vota është lexuar, siç po e shohim edhe sot.
Kamza ka votuar, pavarësisht presioneve. Ka votuar për PD-në dhe jam i bindur se në Kamëz do të fitojmë. Kam besim se, pavarësisht presioneve, ne do të fitojmë.
Unë bëj thirrje nga kjo sallë për çdo komisioner dhe vëzhgues që të qëndrojë fuqishëm, sepse do të ketë mbështetjen tonë dhe duhet të lexojë deri në votën e fundit.
Raporti i OSBE-ODIHR ishte pikërisht ajo çfarë ka ndodhur realisht në terren. Më vjen mirë që kanë pasur mundësinë të marrin informacione.
Gjendja është edhe më e rëndë, pasi ata nuk kanë hyrë në detaje, për mënyrën se si administrata ka shkuar nëpër shtëpi, gjë që unë e kam denoncuar gjatë fushatës.
Zgjedhjet, me këto shkelje, nuk duhet të njihen”, tha Dogjani per Syri tv.
