Kryetari i Lëvizja Bashkë, Arlind Qori, ka deklaruar se ndihet optimist për rezultatin e Lëvizja Bashkë.
Ai deklaroi se kjo parti ka vëzhgues dhe aktivistë kudo, ndaj do të numërohet çdo votë pa u tjetërsuar.
“Jam goxha optimist, sepse çdo orë që kalon më vijnë gjithnjë e më shumë mesazhe nga mbështetësit tanë, jam mjaft optimist, mezi po pres të nisë numërimi nëpër qarqe dhe ky besim të përkthehet në votë.
Jo vetëm në Tiranë, por mendoj se përveç Tiranës, edhe nqë qarqet e mëdha, Lëvizja Bashkë do të marrë rezultat të mirë. Sigurisht Tirana do të jetë e para për mbështetje. Bëj krahasim me vitin 2023, më vinin mesazhe nga qytetarët, sot më kanë ardhur 30-40 fish më shumë. Jam shumë optimist dhe mezi po pres fillimin e procesit të numërimit. Kemi një aplikacion që na mundëson të numërojmë të gjithë votat live.
Ja do të tregoj një histori nga mbrëmë. Dal rrallë natën, por mbrëmë thashë meqë ishte heshtje zgjedhore, dola me disa miq dhe u habita shumë, sepse gjysma e lokalit erdhi të më përshëndeste. Kam ndjesi shumë të mirë për rezultatin e Lëvizja Bashkë.
Dëgjova Klosin, tha 80 deputetë. Do dalë Berisha dhe do thotë 85. Pa filluar numërimi janë bërë 1000. Të jemi seriozë, pavarësisht ndjesive, duhet të themi se duhet të presim nisjen e numërimit dhe të respektojmë qytetarët. Tani nuk kanë rëndësi fjalët. Duhet të jemi të qetë dhe racionalë, të presim kuti pas kutie. Jam shpresëplotë, kemi vëzhgues kudo, aktivistët tanë po akomodohen brenda qendrave të numërimit. Do të kemi sy e veshë ngado. Do të kontrollojmë procesin, asnjë votë nuk do të humbë. Nuk do të dëgjosh në fund të procesit se na zuri gjumi dhe na humbën votat“, tha Qori gjatë një lidhje direkte për emisionin “Të Paekspozuarit”.
