Të paktën 39 të mitur janë vrarë dhe 97 rezultojnë të zhdukur në Meksikën perëndimore, si pasojë e një lufte që ka shpërthyer që nga shtatori i kaluar mes dy fraksioneve rivale të kartelit të Sinaloas – një nga organizatat më të fuqishme të trafikut të drogës në vend – denoncoi Avokati i Popullit i Meksikës.
Karteli i Sinaloas u themelua nga Joaquin “El Chapo” Guzmán, i cili po vuan një dënim të përjetshëm në SHBA, dhe Ismael “El Mayo” Zambada, i cili u arrestua në Teksas në korrik të vitit të kaluar. Mbështetësit e “El Mayo” akuzojnë djemtë e “El Chapo”, të njohur si “Los Chapitos”, se e kanë tradhtuar dhe dorëzuar te autoritetet amerikane.
Përplasjet nisën në shtator në Culiacán, kryeqyteti i shtetit Sinaloa.
Të hënën e kaluar, dy vajza 7 dhe 12 vjeç u vranë pasi u ndodhën mes shkëmbimit të zjarrit mes Gardës Kombëtare dhe një grupi të armatosur në komunitetin Badiraguato – vendlindja e “El Chapo” dhe liderëve të tjerë të kartelit. Një tjetër fëmijë 12-vjeçar u plagos nga plumbat, ashtu si prindërit dhe anëtarë të tjerë të familjes së tij.
Lufta mes trashëgimtarëve të “El Chapo” dhe fraksionit të “El Mayo” ka shkaktuar të paktën 1.200 viktima, ndërsa 1.400 persona të tjerë rezultojnë të zhdukur.
Kjo luftë ka pasur gjithashtu pasoja të thella për ekonominë lokale dhe jetën e përditshme në kryeqytetin Culiacán dhe në komunitete të tjera të shtetit Sinaloa.
