Numri i amerikanëve që aplikuan për përfitime të reja papunësie ra në mënyrë të papritur javën e kaluar, duke treguar se tregu i punës në SHBA mbetet i qëndrueshëm përkundër rreziqeve të shtuara ekonomike nga rritja e tarifave tregtare dhe pasiguritë globale.
Departamenti i Punës raportoi se aplikimet fillestare për përfitime papunësie ranë me 13,000 në një total prej 228,000 për javën që përfundoi më 3 maj. Ky nivel ishte më i ulët se parashikimi prej 230,000 nga ekonomistët.
Megjithatë, ekspertët paralajmërojnë se dobësitë e shfaqura në anketat e bizneseve dhe konsumatorëve mund të shfaqen së shpejti edhe në të dhëna më të prekshme, si inflacioni, raportet e punësimit dhe kërkesat për papunësi.
Rezerva Federale mbajti të pandryshuar normën bazë të interesit në intervalin 4.25%-4.50%, por paralajmëroi për rritje të mundshme të papunësisë dhe inflacionit. Kryetari i Fed-it, Jerome Poëell, tha se tarifat e reja të shpallura nga administrata kanë qenë “dukshëm më të larta se sa ishte parashikuar” dhe paralajmëroi se ato mund të ngadalësojnë rritjen ekonomike dhe të rrisin papunësinë.
Ndërkohë, ekonomia amerikane shtoi 177,000 vende pune në prill, ndërsa norma e papunësisë mbeti e qëndrueshme në 4.2%. Megjithatë, kohëzgjatja mesatare e papunësisë u rrit nga 9.8 në 10.4 javë, çka sugjeron se ata që humbasin vendin e punës po e kanë gjithnjë e më të vështirë të rikthehen në treg.
Pavarësisht kësaj, shumë punëdhënës mbeten të kujdesshëm në largimin e stafit, pasi kanë përjetuar vështirësi për të gjetur punëtorë të kualifikuar gjatë pandemisë.
