Gjykata e Posaçme e Apelit ka shtyrë për më 14 Maj seancën gjyqësore ku do të shqyrtojë ankiminin e SPAK kundër vendimit të Gjykatës së Posaçme, që e detyron të hetojë ish-ministren Olta Xhaçka dhe bashkëshortin e saj biznesmen Artan Gaçi.
Shkak për shtyrjen e seancës është bërë mungesa e kallëzuesit Alfred Beleri, i cili përmes një shkrese i përcillte gjykatës shqetësimin se shqyrtimi në Apel duhet të bëhej në dhomë këshillimi dhe jo në seancë me palët.
Në Apel, SPAK kërkon shfuqizimin e vendimit të 28 shkurtit të gjyqtares së GJJKO-së Flora Hajredinaj, sipas të cilit duhet të vijojë hetimet ndaj Xhaçkës për “shpërdorim të detyrës” dhe Gaçit për “falsifikim të dokumenteve” dhe “pastrim të parave”.
Ish-ministrja dhe bashkëshorti biznesmen u kallëzuan nga ish-kryebashkiaku i zgjedhur i Himarës, Alfred Beleri, për abuzim me ligjin në regjistrimin e dy sipërfaqeve toke në Gjilekë, që më pas u përftuan nga biznesmeni Artan Gaci për të ndërtuar resort si investitor strategjik.
Për këtë çështje nga zyrtarët e lartë është dënuar vetëm ish-kryebashkiaku i Himarës, Jorgo Goro.
