Kreu i CDU-së Friedrich Merz ka arritur që në raundin e dytë në Bundestag të zgjidhet kancelari i ri i Gjermanisë.
Në një votim të mbajtur pasditen e kësaj të marte, Merz ka arritur të marrë 325 vota pro të ligjvënësve në Bundestag , nga 316 që i nevojiteshin.
Merz nuk ia doli dot në raundin e parë të zgjedhjeve për kancelar në Bundestag, ku në një votim të fshehtë arrit të merte vetëm 310 vota, gjashtë më pak se shumica e nevojshme prej 316.
Në përpjekjen e parë aleanca CDU/CSU me Socialdemokratët (SPD) nuk arriti shumicën e nevojshme absolute për kancelar. Të paktën 18 deputetë të koalicionit nuk arritën ta mbështesnin atë.
“Ju falenderoj për besimin dhe e pranoj zgjedhjen”, deklaroi Friedrich Merz, pasi u pyet nga Presidentja e Bundestagut, Julia Klöckner a e pranon zgjedhjen.
Para Merzit, që nga fundi i Luftës së Dytë Botërore asnjë kandidat për kancelar në Gjermani nuk kishte dështuar të zgjidhej në rundin e parë të votimit. Megjithatë, në rundin e dytë, Merz i mori 325 vota.
Koalicioni, i përbërë nga kristiandemokratët e Merzit (CDU), unikoni socialkristian i Bavarisë (CSU) dhe Partia Socialdemokrate e qendrës së majtë (SPD) – do ta qeverisë Gjermaninë për katër vjetët e ardhshme.
Të hënën, kristiandemokratët e Merzit nënshkruan një marrëveshje koalicioni me SPD-në, e cila kishte dalë me rezultatin më të dobët në historinë e saj pas Luftës së Dytë Botërore, vetëm 16.4 për qind.
Aleanca CDU/CSU e udhëhequr nga Merzi dhe partneri në koalicion, Partia Socialdemokrate (SPD), janë zotuar se do ta ringjallin ekonominë e dobësuar dhe se do ta rindërtojnë ushtrinë në një kohë kur presidenti i Shteteve të Bashkuara të Amerikës, Donald Trump, e ka vënë në dyshim të ardhmen e sigurisë dhe lidhjeve tregtare transatlantike.
Merz gjithashtu është zotuar se do ta frenojë emigracionin e parregullt dhe se do ta ndalë rritjen e partisë kundër emigracionit, Alternativa për Gjermaninë (AfD), e cila doli në vend të dytë në zgjedhjet e parakohshme të shkurtit.
